Read lango Carokop 13 Bible Online

Carokop 13 - lango bible

Carokop 13

¹Atin aryek winyo gin ame pappere pwonye kede, ento ŋat ame aŋale mom ye ni juke.

²Dano aber nwoŋo agoba i kop ame en kobo, ento abwol jo cunye mito ka tim me byemi.

³Ŋat ame gwoko kop ame en kobo gwoko kwo mere, ento ŋat ame ŋamo doge i kop atata poto i can.

⁴Awackom kadi bed i mit i kom ginnoro a rom mene mom gire twero nwoŋo, ento ŋat ame tio tic atek nwoŋo ginnoro luŋ ame cunye mito.

⁵Dano a kite atira dago kop me goba, ento ŋat arac timo tim me lewic ame lane alana.

⁶Kite atira gwoko ŋat a cunye atira, ento bal reto ŋat arac areta.

⁷Jo mogo poro bedo olonyo kun gin ocan a mom twerre, ento jo ocele miye ni gin ocan kun otye i jami luŋ ame romogi.

⁸Ŋat alonyo twero lakoro kwo mere i limmere, ento acan mom tye i yo moro me lakoro kwo mere.

⁹Jo a kitegi atira calo tara ame lyel acil meicel, ento jo areco calo tara ame lyel ote neko oko.

¹⁰Lo ame awaka dok daŋ apyem yelo jo nono, ento lo ame gamo tam ame omie doko ŋat aryek.

¹¹Lonyo ame bino ni wuk awaŋe acel rwenyo oko, ento ŋat ame lim bino i ciŋe momot limmere medde.

¹²Gin ame dano geno ka mom onwoŋo kelo two i cunye ento gin a dano mito ka ocobere bedo calo yat me kwo.

¹³Ŋat ame cao kop ame okobbe nwoŋo okelo can i kome kene, ento ŋat ame lubo gin ame ociko ni tim nwoŋo mot pire.

¹⁴Pwony a jo aryek calo waŋ pi i me kwo, mio dano bwot i owic me to.

¹⁵Ŋat ame wie tio jo bedo i geni kome, ento ŋat a mom agen nwoŋo doŋ tye i yo me to.

¹⁶Ŋat aryek cobo ticcere i ŋec ame romo, ento amiŋo bedo nyuto miŋo mere baŋ jo ocele.

¹⁷Akwena arac kelo peko i kom jo, ento akwena agenne kelo kuc.

¹⁸Can kede cwercuny bino baŋ ŋat a mom ye ni pwonye, ento ŋat ame ye ni juke bedo ŋat a jo woro.

¹⁹Mit a dano ka ocobere kweo cunye meicel, ento amiŋo mom ye weko gin arac.

²⁰Lo ame maro mako dyere i jo aryek doko ŋat aryek, ento ŋat a nywako yo i jo amiŋ bale abala.

²¹Gin arac maro lubo yo jo ame obalo, ento jo a kitegi atira nwoŋo mot me jami abeco.

²²Dano aber wekki ikwae lim ame gin twero leyo, ento lonyo a jo ame obalo kobo i ciŋ jo a kitegi atira.

²³Lobo ame oweko owe kare alac ceko cem abup baŋ acan, ento jo a mom okica mao oko i baŋe i tim a mom atira.

²⁴Ŋat a mom goo atinnere nwoŋo mom maro, atin ame omaro, opwonyo. Ŋat a kite atira nwoŋo cam ame rome kare luŋ, ento dano arac kec neko kare ducu.