Read lango Carokop 14 Bible Online

Carokop 14 - lango bible

Carokop 14

¹Mon aryek mio pacogi bedo paco aber a kuc tye iye, ento mon amiŋ turo pacogi atura.

²Dano ame kwo mere ber ŋwoŋo lworo Rwot ento ŋat alubo yo a mom atira cao Rwot acaa.

³Kop a ŋat amiŋ calo lut ame ogoe kede, ento ŋat aryek kobo kop ame gwoke agwoka.

⁴Kan a mom opuro i kweri cam mom cek i ye abup, ento puro poto i kweri mio cam cek abup.

⁵Acaden ame genne mom pido kop me goba, ento acaden agoba loko goba keken.

⁶Won aŋale mom twero doko ŋat aryek, ento ŋat aniaŋ atut ŋeccere medde oyotoyot.

⁷Ya oko i baŋ ŋat amiŋ, pien mom tye ginnoro ame iromo ŋeyo i baŋe.

⁸Ryeko mio dano nwoŋo kite a myero ebed kede, ento miŋo bwolo dano abwola.

⁹Ŋat amiŋ mom paro ginnoro ka otimo bal, ento ŋat a cunye atir kwao kica.

¹⁰Yin iŋeo gin ame tye i cuny ka lim onyo kec, mom tye ŋattoro ame twero nywako kedi gin i cunyi.

¹¹Ot a ŋat a kite rac balle oko, ento paco a jo kitegi beco bedo gire aber,

¹²Tye yo mogo ame dano tamo ni ber, kun kara obedo yo ame tero jo i to,

¹³Dano twero nyero kun nwoŋo cunye mom yom, icennere te dok bedo kede kumo.

¹⁴Ŋat a kite atira nwoŋo mottere pi kite-nono, ento ŋat a kite ogom nwoŋo mottere oporo gin ame en timo.

¹⁵Ŋat amiŋ ye kop ducu, ento ŋat a wie tio koŋ ŋio jami i nyime,

¹⁶Ŋat aryek gwokkere mom lutte i tim arac, ento amiŋo donyo ata kun mom koŋ tamo.

¹⁷Won akemo agwa timo tim me miŋo, ento ŋat aryek bedo mere mot.

¹⁸Jo amiŋ nwoŋo gin ame gin omito i yore me miŋo miŋo, ento jo aryek opokigi mot me ŋec oromo.

¹⁹Jo areco rumo congi woro jo a kitegi ber, kede otim tim areco ocokere doggola a jo a kitegi atira pi kelo kwacgi.

²⁰Acan jo dago anaka jo i ŋete, ento olonyo tye owote mere apol ata.

²¹Ŋat ame cao dano ocele nwoŋo abalo, ento ŋat ame kica mako i kom ocan tye kede yomcuny.

²²Jo ame paro pi timo gin arac rwenyo arwenya, ento jo ame paro pi gin aber bedo jo ame omaro dok ogeno.

²³Ticcoro luŋ atek tye iye goba, ento kop akopa kelo can.

²⁴Kwogo a jo aryek obedo ryekogi, ento mola ŋut ŋat amiŋ ame omio en ŋeye obedo miŋo mere.

²⁵Acaden laro kwo a dano ka okobo ateni, ento ŋat ame kobo kop me goba obedo won adote.

²⁶Lworo Rwot mio dano bedo kede gen adwoŋ, itino mere nwoŋo kan ame otwero laro.

²⁷Lworo Rwot en obedo waŋ pii me kwo, en a mio dano twero gwoko owic ato.

²⁸Jo apol ame abaka loo en ame mie kwogo, ento aloc a jo mere mom doŋ oto oko.

²⁹Ŋat ame mom ŋo oyotoyot tye kede twon ŋec adwoŋ meicel, ento ŋat ame akemo mako oyotoyot obedo twon amiŋo meicel.

³⁰Ka cuny dano tye ame opye mot kome daŋ bedo yot, ento akemo balo cogo kom dano.

³¹Ŋat ame wuno acan nwoŋo ocao Obaŋa ame okete, ento ŋat ame kica mako i kom jo a mito kony nwoŋo woro Obaŋa,

³²Atim gin arac poto i gin arac ame etimo, ento ŋat a kite atira larre pi bedo dano a genne.

³³Ryeko bedo i cuny dano ame ŋeo gin a myero etim, ento ŋat amiŋ a mom ŋeo gin a myero etim cunye bedo nono.

³⁴Kite atira mio rok bedo rok ame oŋeo meicel, ento bal kelo lewic i kom rokkoro keken.

³⁵Amiro ame tio ticcere i ryeko, adwoŋŋere pwoc ento akemo make i kom amiro ame tio gin a kelo lewic.