Read lango Carokop 15 Bible Online

Carokop 15 - lango bible

Carokop 15

¹Gamokop i mwolo kweo akemo a dano oko, ento dwon agwa medo akemo ameda.

²Ŋat aryek kobo kop me pwonyo jo, ento amiŋo tiko wuko ka kop me miŋo keken.

³Waŋ Rwot neno kabedo luŋ; en neno jo areco kede jo abeco.

⁴Kobo kop i mwolo obedo calo yal me kwo, ento kop agwa kelo two cuny dano.

⁵Amiŋo cao pwony a pappere, ento ŋat ame winyo pwony en dano aryek.

⁶Lonyo dwoŋ i ot a ŋat a kite atira, ento can balo lim a bino i ciŋ ŋat arac oko.

⁷Jo aryek kobo kop ame mio jo medde ŋeyo jami apol, ento kop a jo amiŋ mom pwonyo ŋattoro.

⁸Rwot dag mot ame atim tim arac oŋolo me yale, ento cunye yom i kwac a ŋat a cunye ler.

⁹Rwot dag tim a jo areco, ento en maro jo ame timo gin ame tye atira.

¹⁰Ŋat ame kwero lubo yo a Rwot obino keto can adwoŋ i kome, ŋat a pe ye ni juke bino to.

¹¹Rwot ŋeo jami ducu ame tye piny i lyel, kara doŋ cuny dano kono?

¹²Won aŋale mom ye ni juke, mom daŋ woto baŋ jo aryek.

¹³Ŋat ame cunye yom, yom cunye nen i waŋe, ento cwercuny mio waŋ dano bale oko,

¹⁴Dano aryek cunye poŋ i mit me pwonyere, ento ŋat amiŋ paro kop me miŋomiŋo keken.

¹⁵Dano ame owuno kare me kwo mere poŋ ican, ento ŋat ame cunye yom camo arama kare luŋ.

¹⁶Ŋat ame tio kede lim anok kun lworo Rwot, bedo aber kato ŋat ame tio kede lim adwoŋ kun tye kede ayela.

¹⁷Camo pot dek i jo ame imaro, ber kato camo twon riŋo amio i paco ame dagere dwoŋ iye.

¹⁸Won akemo tubo jo, ento ŋat ame kanyo akemo kelo kuc.

¹⁹Yo awackom culle acula okuto, ento ŋat a cunye ler, yore ler ata.

²⁰Atin aryek yomo cuny pappere, ento dano ame miŋ cao tottere acaa.

²¹Ŋat a wie mom tio cunye bedo ayom i kop me miŋo miŋo, ento ŋat atye i niaŋ atut bedo i kwo atira.

²²Ŋat ame tio kene aboŋo winyo tam, yikkere mom cobere aber, ento ŋat a gamo tam a jo apol yikkere cobere.

²³Dok ipeny kakare kelo yomcuny, kede kobo gin ame nwoŋo amito i kare a mitte ber meicel.

²⁴Ŋat aryek lubo yo ame tere i kwo, ento weko yo ame tere piny i lyel.

²⁵Rwot turo udi a jo awakere oko, ento gwoko waŋ lobo a dako a cware oto.

²⁶Rwot dag tam a jo areco, ento kop a ŋat aber kobo yommoro cunye meicel.

²⁷Ŋat ame owor me nwoŋo agoba i yore a mom atira kelo ayela i kom jo me ode, ento ŋat ame dag lim ame owilo i jo i muŋ mom bino to.

²⁸Jo a kitegi atira koŋ tamokop kun pe ru odok iye, ento ŋat arac wuko kop arac aboŋo paro.

²⁹Rwot mom noko laŋet ŋat arac, ento winyo kwac a dano a kite atira.

³⁰Waŋ aber mio dano yomcuny, amut aber mio cuny dano gony.

³¹Ŋat a winyo kop ame ojuke kede, bedo i akina jo aryek.

³²Ŋat ame mom ye pwony ajo nwoŋo ocaye kene, ento ŋat ame ye ni juke medde niaŋ i jami apol.

³³Bedo i lworo i kom Rwot en aye doggola me doko ryek, bedo i woro en aye doggola me bedo ŋat ame oworo.