Read lango Carokop 16 Bible Online

Carokop 16 - lango bible

Carokop 16

¹Dano twero tamo pi gin a myero eti i cunye, ento Obaŋa en ame mio cobere.

²Dano neno gin ame etio luŋ ni ber, ento Rwot pimo cuny dano.

³Ket ticci luŋ i nyim Rwot, en bino miyo tammi cobere aber.

⁴Rwot tye ked yik pi jami luŋ ame en oketo, ento gin ame en oyiko pi jo areco en to,

⁵Rwot dago jo a wakere; ŋe atira ni kodi jo-nono mom bino bwot ame mom oketo cannoro i komgi.

⁶Rwot weko bal a jo a genne, ame mare, dok bedo i lworo i kom Rwot mio dano geŋere i tim arac.

⁷Ka ce kit a dano moro-ni yomoro cuny Rwot, en mio okworrere daŋ bedo kede kuc.

⁸Bedo i jami anonok kun inwoŋo i yore aber, ber kato twon lim adwoŋ ame inwoŋo i yo a mom atira,

⁹Dano yiko kit a kwo mere myero bed kede i cunye, cite Rwot en ame telle me cobo.

¹⁰Abaka kobo gin ame Rwot en okobbe, mom timo balloro i kop ame eŋolo.

¹¹Rwot mito mijan kede ratili ame pimo jam i kakare, kidi pimo jami luŋ myero bed i te loccere.

¹²Timo gin arac obedo gin me kwer baŋ rwode, pien loc cuŋ atek ka jo tye atimo gin atye atira.

¹³Yi abaka bedo yom i kom jo ame kobo kop atira, gin maro jo ame kobo kop ateni.

¹⁴Akemo ka omako abaka dano to, ento ŋat aryek kweo cunye.

¹⁵Yomcuny abaka ka onen i waŋe, mio dano kwo, kica mere calo pol ame mio kot cwe i cwir.

¹⁶Nwoŋo ryeko ber kato nwoŋo lonyo, yero niaŋ atut kato yero bedo i lim.

¹⁷Jo a cunygi atira lubo yo a mom terogi itimo gin arac; ŋat ame gwoko kite bino laro kwo mere.

¹⁸Awaka tero dano ican, abwone mio dano poto.

¹⁹Bedo karacel ocan i cuny me mwolo, ber kato poko jami ayaka i jo a wakere.

²⁰Ŋat ame winyo gin ame opwonye kede bino bedo i kwo aber, dok ŋat ame geno Rwot tye kede yomcuny.

²¹Ŋat aryek i cunye olwoŋo ni ŋat atye i niaŋ atut, dok ŋat akobo kop amit loo tam a jo apol.

²²Ryeko calo waŋ pii me kwo baŋ ŋat ame tye kede, ento miŋo pwodo wonnere.

²³Tam a ŋat aryek mio en kobo kop ame nwoŋo koŋ otamo aber, dok mio kop ame en kobo loko tam a jo apol.

²⁴Kop me kica lim calo kic, calo yat ame kweo cuny kede yat ame caŋo kom.

²⁵Tye yo mogo ame dano tamo ni ber, kun kara tero jo i to,

²⁶Mit me cam mio dano tio ticcere aber; kec en ame cukoro cunye.

²⁷Loo arac ame kwo mere mom ber yenyo yo me timo jo rac, dok kop ame en kobo lyet calo mac.

²⁸Ŋat a kite ogom kelo pyem keken, dok ŋat akwot jo tubo jo ame mare.

²⁹Atim tim me byemi bwolo jo abedo kede, gin ame en timo-nono tere i yo a mom ber.

³⁰Ŋat ame mimio waŋe atata nwoŋo tye i yik me timo gin arac, ŋat aliŋaliŋa mio gin arac timmere kun en aneno.

³¹Perakino obedo mot ame omio baŋ jo a tye i kwo aber, lwar obedo tok kwogo me wic.

³²Ŋat ame akemo mako oyot ber kato twon lo atek, ŋat a loo tam i cunye ber kato ŋat ame man boma twal.

³³Obol kwir bolo kwir, ento adwoggi mere tye i cin Rwot.