Read lango Carokop 17 Bible Online

Carokop 17 - lango bible

Carokop 17

¹Kwon aŋic ame ocamo i kuc, ber kato arama ame ocamo i ot a kuc mom iye.

²Opii ame tio ticcere i ryeko, bino loyo atin adwoŋ me ot ame timo tim me lewic, dok bino nywako ginalea karacel i jo me ottono.

³Jabu kede ryal otemo i mac, ento Rwot temo cuny dano.

⁴Ŋat a maro timo gin arac ciko yite i kop a jo areco, agoba ciko yite i kop me goba.

⁵Ŋat ame ŋalo acan nwoŋo oyeto Obaŋa ame okete, ŋat ame lelo gire alela ka can opoto i kom owotte mere, mom bino bwot a mom oketo can i kome.

⁶Odoŋ oti nwoŋo kwogo pi ikwaegi, itino nwoŋo kwogo pi papagi.

⁷Dano ame jo woro mom kobo kop me goba, dok daŋ mom maro winyo kop abeco ame amiŋo kobo.

⁸Owil jo imuŋ geno timgi-nono calo jo a geno yen gwoko komgi atye i komgi, gin geno ni twero miyogi onwoŋo gum i kabedo luŋ.

⁹Ŋat atimo kica baŋ ŋat otimo bal nwoŋo mito mer bed ŋye i akinagi, ento ŋat ame bedo poyo bal acon balo dyere ame tye i akinagi.

¹⁰Ŋat a niaŋ atut, pwonyere ka ojuko, ame kato ŋat amiŋ ame opwodo lut tyen mia acel.

¹¹Atim tim arac maro jem kare ducu, timmere-nono mio ecop i kom lo moro ager te time lit.

¹²Tika irwatte i ŋuu ager ame itino mere oneko oko, kato ame irwatte i ŋat amiŋ kun atimo tim me miŋo miŋo.

¹³Ŋat ame dwoko gin arac pi gin aber, gin arac mom ya i ode.

¹⁴Gin akelo lweny cakere momot calo pii ame ocako molo amola, pi mannono myero ijuk ame pwod ocakere acaka.

¹⁵Rwot dag ŋat ame mio dano arac loo kop, kede ŋat ame mio kop loo ŋat a kite atira,

¹⁶Konyo kara ŋo dano amiŋ me bedo i lim me wilo ryeko, kun koŋo mom tye i wic ame romme pwonyere?

¹⁷Awotti nyuto marrere kare luŋ, ominni bedo ŋat ame inywako wunu kede peko,

¹⁸Ŋat ame wie mom tio jeŋo jami mere ata, pi culo baŋya a ŋat a mom eŋeo.

¹⁹Ŋat ame maro timo bal, maro daŋ kelo pyem, ŋat ame mio doggola mere bedo malo amala yenyo to.

²⁰Ŋat ame tamo tam arac i cunye mom twero bedo i kwo aber, ŋat ame kobo kop a mom ber mom niaŋ poto i can.

²¹Atin ame wie mom tio cwero cuny pappere, pappa a ŋat amiŋ mom bedo kede yomcuny kadi acel.

²²Yomcuny obedo twon yat aber meicel, me caŋo two, ento cwercuny mio dano mok amoka.

²³Dano arac gamo lim ame owile kede imuŋ, wek ebal ŋolo kop kakare.

²⁴Dano ame niaŋ keto cunyei gin ame medde ryeko, ento dano amiŋ bedo ata kun mom tamo ginnoro.

²⁵Atin ame wie mom tio cwero cuny pappere, dok mio tottere onywale bedo kede kumo i cunye.

²⁶Mom ber me keto can i kom dano a kite atira, pwodo jo ame oworo rac atek.

²⁷Ŋat atye i ŋec mom duro kop apol apola, ŋat ame niaŋ atut cunye pye mot.

²⁸Ŋat amiŋ ame liŋ gire aliŋa, otero calo dano aryek, ka ce en mom bedo duro doge atata, jo tamo ni en niaŋ kop apol.