Read lango Carokop 18 Bible Online

Carokop 18 - lango bible

Carokop 18

¹Dano ame mom ribere i jo ocele, paro pire kene, daŋ mom maro ye gin a jo ocele kobo ni tye tira,

²Amiŋo gire mom paro pi niaŋ jami, en paro pi nyuto tammere keken.

³Tim arac kede acae nywako yo acel, alee twodo dano ame mom oworo.

⁴Kop ame dano kobo calo pii atut, waŋ pii me ryeko calo pii kulo a kukunya.

⁵Dworo ŋat arac mom ber, onyo balo ŋolo kop a ŋat a kite atira.

⁶Kop a ŋat amiŋ kobo kelo pyem, kop ame en kobo lwoŋo lut i kome.

⁷Kop ame amiŋo kobo en ame kelle to, kop ame lebe kobo en ame obedo owic me cike,

⁸Kop akwot jo mit meicel, winyo mit calo mwonyo kwon obwol.

⁹Ŋat ame kome wac i tic, rom aroma i ŋat ame balo jami abala.

¹⁰Nyiŋ Rwot tye acalo twon gedo moro atek, ame dano a kite atira riŋo laro.

¹¹Alonyo geno lonyo mere me larre, lonyo mere calo boma atek ame en riŋo laro,

¹²Dano wakere ka can pwod pe, ento bedo i woro en doggola me bedo a ŋat ame oworo.

¹³Koŋ ige winyo aber kun mom ru idok i kopporo-ni, ka ce mom itimo amannono inyuto miŋoni dok ikelo lewic i komi keni.

¹⁴Dano ka cunye tek twero diyo cunye ka two, ŋa kara ame twero konye ka cunye doŋ odoko goro.

¹⁵Ŋat a wie tio twero doko ŋat a ŋeo jami, jo aryek tero yitgi i winyo kop ame meddigi pwonyere.

¹⁶Miyo mot yabbi dano yo, mio en tuno i nyim jo adoŋo.

¹⁷Ŋat ogeo pido i nyim okiko tamo ni koppere tye kakare, tuno ka omio ŋat epidde opepenyo en.

¹⁸Bolo kwir en ame tyeko pyem, ka ce twoni jo aryo ocwiny tye apyem i okiko.

¹⁹Konyo dano mio en doko cel atek ame gwok i, ento daa pokowu, mio en kwero miyi kony oko.

²⁰Dano yeŋ i gin aber pi kop oya i doge, kop ame lebe kobo lokere dok konye.

²¹Akadi to onyo kwo bino pi kop a dano kobo, jo ame maro kobo kop meicel bilo adwogi me kopgi-nono.

²²Ŋat onwoŋo dako nwoŋo onwoŋo gin aber, Rwot nwoŋo doŋ opwoc,

²³Acan bako doge abaka ka akop, ento alonyo gamokop i dwon agwa,

²⁴Tye jo mogo ame bwolo owotegi abwola ni omaro, ento tye jo mogo ame ikin i kom owotegi kato omego oko.