Read lango Carokop 19 Bible Online

Carokop 19 - lango bible

Carokop 19

¹Tika ibed acan ame genne, kato bedo i ŋat amiŋ ame kobo kop ogom,

²Mom ber me bedo aboŋo ŋec, mac a lyel birabira mom ceko cem amit.

³Ŋat amiŋ ka opoto i peko pi timmere me miŋo, cako koko-nono i kom Rwot.

⁴Lonyo nyao dyere meicel, ento can ryemo dyere aryema.

⁵Acaden agoba mom bwot a mom oketo cannoro i kome, akob kop goba mom bino bwot.

⁶Jo apol mito ni ŋat a maro konyo jo pwoogi, dok jo maro mako dyere i ŋat ame maro miyo jo mot.

⁷Ŋat acan omego mere luŋ dago, kara doŋ owote mere bino bedo kede abor rom mene? En ryemo yorgi i kop i doge keken, cite mom romo makogi kadi acel.

⁸Ŋat ame tye i ryeko marre kene, ŋat ame gwoko niaŋ atut ame etye kede bedo aber.

⁹Acaden agoba mom bwot a mom oketo cannoro i kome, akob kop goba bino to,

¹⁰Amiŋo mom porre bedo i lwak jami apipim, opii daŋ mom porre loyo rwode.

¹¹Ŋat ame wie tio akemo mom mako oyotoyot, weko bal ame otimo i komi aweka kelo kwogo i komi.

¹²Akemo abaka calo koko eŋatu, ento kica mere calo toyo ame luk i kom lum.

¹³Atin amiŋ mio pappere to, dako a da calo kot ame ŋido nakanaka.

¹⁴Ot kede lonyo itwero leyo i baŋ kwaroni, ento dako aryek Rwot en amio.

¹⁵Wackom kom mio dano nino meicel, ŋat a nyap mato kec okato kare.

¹⁶Agwok cik a Rwot gwoko kwo mere, ento ŋat ame cao acaa to oko.

¹⁷Ŋat akica baŋ ocan nwoŋo omio moko kato baŋya baŋ Rwot, Rwot bino culle pi ticcere-nono.

¹⁸Pwony otinoni con kun pwod otino, myero igwokere kur inekgi aneka.

¹⁹Ŋat akemo mere gwa akemo mere kelo can i kome, pien ka ce ilare icel en bino mito ni dok ilare.

²⁰Bed ŋat ame gamo tam kun iwinyo gin ame opwonyi kede, me ibed ŋat aryek i anyim.

²¹Dano bedo kede yik apol meicel cunye, ento gin ame Rwot mito en ame cobere.

²²Gin ame mitte i kwo a dano en cuny me mar, acan ber kato agoba.

²³Bedo i lworo i kom Rwot tero dano i kwo, ŋat ame lworo Rwot bedo a cunye opye mot, ginnoro arac mom twero gudo kome,

²⁴Awackom luto ciŋe i tabo, ento cwayo cam i doge loo oko.

²⁵Pwod won aŋale, jo amiŋ bino pwonyere, juk ŋat a niaŋ, en bino ŋeyo jami apol.

²⁶Atin a yenyo pappere i kolo dok ryemo tottere oko i paco, obedo atin a kelo lewic kede alane baŋ onywalle.

²⁷Atinna, ka ce ikwero winyo gin ame apwonyi kede, nwoŋo doŋ iweko pwony ame medo ŋecci oko.

²⁸Acaden a konyere pe, cao kop ame oŋolo kakare, jo areco maro timo bal calo balgi.

²⁹Wegi aŋale doŋ oŋolligi kop oko, omiŋo daŋ obino pwodo yo ŋegi.