Read lango Carokop 2 Bible Online

Carokop 2 - lango bible

Carokop 2

¹Atinna, ka ce iwinyo gin ame apwonyi kede, kun igwoko cikka luŋ i cunyi,

²kun imio yiti bedo abit i winyo kop me ryeko, dok daŋ iketo cunyi me niaŋ;

³ka ce ibino kok pi niaŋ atut, kun icwalo kwacci pi bedo kede ŋec,

⁴ka ce ibino yenyo calo ryal, kun iyenyo calo lonyo ame okano;

⁵mannono bino miyo iŋeo kop i kom lworo Rwot, dok daŋ ibino bedo kede ŋec i kom Obaŋa.

⁶Pien Rwot gire en ame mio ryeko, ŋec kede niaŋ ya gire i kop ame en kobo.

⁷En kano ryeko aber meicel pi jo ame cunygi atira, en bedo kwot ame gwoko jo a lube i cuny aler.

⁸En gwoko jo ame ŋolo kop atira, gwoko daŋ jo ame omio kwogi i ciŋe.

⁹Mannono bino miyo iniaŋ gin ame atira, kede tero jo arorom, ite lubo yo ame omito keken,

¹⁰Pien ryeko bino donyo i cunyi, cunyi bino bedo yom me bedo kede ŋec.

¹¹Bedo kede ŋec atut bino gwoko kwoni, niaŋ aber bino gwoki.

¹²Bino lari i yo me timo gin arac, kede i ciŋ jo ame dwanyo kop,

¹³jo ame weko bedo i kite atira, kun omito wot i piny acol,

¹⁴jo ame yigi yom i timo gin arac, jo ame lelo gigi alela i tim arac.

¹⁵Gin jo ame mom genne kadi acel, ame lubo yo a mom atira,

¹⁶Bino konyi me loyo tam a dako ame alaya, ame bwobwolo yin i kop amit me wayo tammi i kome,

¹⁷dako ame weko cware ame enyomere kede a pwod tidi, kun wie wil oko i gwoko cikere Obaŋa mere;

¹⁸dako ame ka iwoto i ode nwoŋo iyenyo giri to, yo ame en lubo teri ka i lobo a jo oto,

¹⁹Mom tye ŋattoro ame donyo baŋe te dok nwoŋo yo me dwogo cen akadi nwoŋo yo me dwogo i yo me kwo,

²⁰Pi mannono ba, myero ilub yo jo a kitegi atira, kur iya i yo a jo a kitegi atira.

²¹Pien jo a cunygi atira bino bedo i lobowa, jo a cunygi ler bino bedo kuno.

²²Ento jo a kitegi reco waŋgi bino rwenyo oko i lobogi, wegi adote daŋ obino puputo oko acalo doo.