Read lango Carokop 20 Bible Online

Carokop 20 - lango bible

Carokop 20

¹Koŋo mio oyeti dok mat okato kare miyo dano yeto jo; ŋat ame omio mit me koŋo obwole nwoŋo mom ryek.

²Akemo abaka rom aroma i koko eŋatu, ŋat ame mio akemo mako abaka nwoŋo mom paro pi kwo mere.

³Ŋat a mom lutte kan a daa tye iye jo woro, ento amiŋo bedo gire da adaa.

⁴Awackom mom puro poto mere kare ame kot tye, i kare me kac en geno piny nono.

⁵Yik ame dano tye kede i cunye calo pii atut, ento dano ame tye i niaŋ atut twomo oko,

⁶Dano twero rabo pi kica mere tyen apol ata, ento ŋa ame twero nwoŋo ŋat a genne?

⁷Ŋat ame genne ame cunye ler, ikwae tye kede gum kadi ka en oto.

⁸Abaka ame bedo i wi kom me ŋolo kop, yeko gin arac luŋ.

⁹Ŋat ame twero kobo ni, “Doŋ atyeko lwoko cunya doko acil; an doŋ acil odoco aboŋo balloro?”

¹⁰Rwot dag kidi me pimo jami a mom pimo jami kakare, kede gwata pimo jami ame cero jo.

¹¹Kadi atin nyuto kite oko i gin ame etio, ka gin a en etio ber dok atira.

¹²Yit ame winyo kop kede waŋ ame neno piny, gin luŋ obedo tic a Rwot.

¹³Kur imar nino anina naka mio idoko acan, yab waŋi me iti tic me ibed i cam abup.

¹⁴Awil cucura baŋ acat jami ni, “Rac rac” ento kaojer teŋe te cako wakere.

¹⁵Ka ce iŋeo gin ame ikobo, itye i gin me wel akato jabu kede gweŋ alilia.

¹⁶Gam ruk a dano ka ce en ojeŋo pi baŋya a ŋat a mom eŋeo, make en i kome ka ce en onwoŋo ocuŋ a rok.

¹⁷Kwon ame obwola abwola lim bala kic, ento i ŋe camo dogi poŋ i kwoyo.

¹⁸Gamo tam mio yik a dano cobere; kur icak lweny ka yikki mom ba.

¹⁹Ŋat a bedo rimo piny i kwokwoto jo, tuco i muŋ a jo ocele, pi mannono myero kur inotte wun i ŋat a kobo kop miŋomiŋo.

²⁰Ŋat a ceno pappere onyo tottere, kwo mere bino bedo calo tara ame tyel ote neko oko, piny te bedo acol icuc.

²¹Lim ame dano oleo oyotoyot, gum mom iye i agikki mere.

²²Kur ikob ni, “Abino culo gin arac i gin arac,” kur Rwot, en ame bino konyi

²³Rwot dag kidi me pimo jami ame mom pimo jami kakare, mijan me cero jo mom ber kadi acel.

²⁴Rwot en ame telo dano i kwo mere nino i nino, kara doŋ dano twero niaŋ kit a kwo mere tye kede i yore aŋo ba?

²⁵Ŋat ame jalo jami mere baŋ Rwot kun nwoŋo mom koŋ otamo eka te tamo doŋ icen kun doŋ okwoŋo oko, dano-nono nwoŋo calo winyo ame omoko i tol.

²⁶Abaka aryek ŋeo yeko jo mere areco oko, eka te keto can i komgi.

²⁷Cuny dano en obedo tara a Rwot, menyo ginnoro luŋ ame nwoŋo opono iye.

²⁸Abaka ame genne kun daŋ maro jo mere, ri i loc, en ri i wi kommere me loc nakanaka ka ce kite atira.

²⁹Kwogo a dano a pwod tidi obedo teko mere, ento ber a dano oti tye i lwar i wie.

³⁰Adoŋ ame keto ret i kom dano kwanyo gin arac oko, lut daŋ loko kwo a dano bedo aber.