Read lango Carokop 21 Bible Online

Carokop 21 - lango bible

Carokop 21

¹Rwot en ame loo cuny abaka, en loko kite a en mito calo pii ame otwero miyo mol tuŋŋoro keken.

²Dano twero tamo ni gin ame en etio luŋ tye kakare, ento Rwot pimo cuny dano.

³Timo gin atye atira kede ŋolo kop kakare, en ame Rwot pwoo kato yale kede mot aŋola.

⁴Waŋ arac ame acae kede cuny a wakere, gin luŋ obedo bal, ento jo areco miogi obedo calo taragi me menyogi.

⁵Yik ame otamo aber tero dano i nwoŋo jami abup, ŋat ame bunyo tiyo ginnoro oyotoyot bedo acan.

⁶Lonyo ame onwoŋo pi kobo goba, duny oko calo awura, dok calo owic ame kelo to.

⁷Tim me kolo a jo areco timo bologi i mac, pien gin okwero tiyo gin a tye kakare.

⁸Wegi roc lubo yo ogom, ento kite a jo a cunygi ler tye arira.

⁹Bedo i ot ocele kadi mom ber wok, ber kato nywako ot wun i dako ame maro da.

¹⁰Ŋat a cunye maro timo gin arac, kica mom mako i kom dano wadgi.

¹¹Ka ce oketo can i kom won aŋale, ŋat a wie mom tio cako pwonyere, ento ŋat aryek ka ce opwonyo apwonya, waŋe yabere.

¹²Dano a kite atira neno jo ame tye i udi a jo a timo tim arac, atim tim arac obino canyo oko piny.

¹³Ŋat ame culo yite oko ka ce acan akok baŋe, kare ame en bino kok, jo daŋ bino culo yitgi oko i koko mere.

¹⁴Mot omio imun baŋ ŋat a cunye owaŋ kweo cunye, lim me wilo dano i mun kweo twon akemo adwoŋ oko.

¹⁵Ka ŋolo kop woto kakare, jo a kitegi atira bedo i yomcuny, entu jo otimo gin arac bedo i kumo.

¹⁶Ŋat ame ya oko i yo me ryeko, bino nwoŋo ni etye ka nywako kabedo i lwak jo oto.

¹⁷Ŋat ame maro yomoro ka cunye kaken, bino bedo twon acan amom twerre dok ŋat ame maro mato koŋo kede camo moo keken, mom twero doko alonyo kadi acel.

¹⁸Atim tim arac i kom ŋat a kite atira wao can i kome kene, dok ŋat a mom genne wao can i kome pi wuno ŋat a cunye ler.

¹⁹Tika ibed giri i tim ata, kato nywako kabedo kede dako ame maro da kede pido atata.

²⁰Lonyo akana abeco ame malo meicel doŋ i ot a lo aryek ento ŋat amiŋ balo mere abala.

²¹Ŋat ame keto cunye me bedo dano a kite atira kun akica, bino nwoŋo kwo kede woro.

²²Ŋat aryek twero mayo boma ame twoni jo atek en a kuro, babalo celgi atek ame ogeŋo oko.

²³Ŋat ame gwoko kop ame ya i doge, geŋo ayela mom bino ikome.

²⁴Ŋat a wakere dok daŋ cao jo olwoŋo ni, “Won aŋale,” ame tio ticcere ducu awaka awaka,

²⁵Awackom to i mittere, pien ciŋe nwoŋo okwero mako tic oko.

²⁶Atim tim areco rio paro jami a jo ocele naka ceŋ iyul, ento ŋat a kite atira poko gin etye kede i cuny aler.

²⁷Rwot dag mot ame atim tim arac ŋolo me yale, kara doŋ ka en okelo motterenono i cuny a mom ber kono?

²⁸Acaden agoba bino to, ento ŋat ame tamokoppere odoco kun mom ru okobo bino ri nakanaka.

²⁹Ŋat a timo tim arac mom lwor, ento ŋat a cunye ler koŋ tamo kite me bedo mere.

³⁰Ryeko mere, niaŋ atut, tam ame omio, gin luŋ mom ginnoro i nyim Rwot.

³¹Aguragura oyiko cutu pi kare me lweny, ento loc tye gire i ciŋ Rwot.