Read lango Carokop 22 Bible Online

Carokop 22 - lango bible

Carokop 22

¹Bedo i nyiŋ aber ber kato bedo kede lonyo adwoŋ; pwoc ame opwoyi kede ber kato kit limmoro ducu.

²Alonyo kede acan gin acel, Rwot gire en oketogi luŋ.

³Ŋat a wie tio neno peko a bino te geŋere, ento ŋat ame kwia piny medde mere anyim naka ka opoto i can.

⁴Ŋat ame wor, ame lworo Rwot, bino nwoŋo lonyo, woro kede kwo perakino.

⁵Okuto kede owic bedo i yo a jo a kitegi ogom, ŋat a gwokkere kene pe lubo yorgi.

⁶Pwony atin con i yo ame en myero bin lubi, en mom dok bino ya i yo-nono ka doŋ oteggo.

⁷Acan bedo i te loc alonyo, dok akwa-kwac bedo opii a ŋat edeno lim i baŋe.

⁸Ŋat acoo koti me balo ŋolo kop kakare, bino nwoŋo can acalo gin ocek pi ticcere-nono, lut me akemo mere bino poto piny nono.

⁹Ŋat a cunye yom i konyo jo bino nwoŋo gum, pien en nywako cammere kede ocan.

¹⁰Ryem aŋal jo oko i akinawu, lweny kede ayet bino gik oko.

¹¹Ŋat ame cunye cil dok maro kobo kop me kica, dano-nono bino bedo awot abaka.

¹²Rwot ciko waŋe i ŋec a dano tye kede, en kwero kop a jo a mom genne oko,

¹³Anyapo kobo ni, “Eŋato gire tye oko, mio bino neka i dye yo ata.”

¹⁴Dog dako alaya calo twon bur atut, ŋat ame akemo omako Rwot i kome bino poto iye.

¹⁵Miŋo boye i cuny atin ka pwod tidi, cite lut me pwony ryemo oko i cunye.

¹⁶Ŋat ame wuno ocan pi medo lonyo mere, onyo ame mio mot baŋ olonyo, bino bedo twon acan.

¹⁷Koŋ icik yiti iwiny kop me ryeko meicel, mi tammi bed i kop ame aŋeo ame apwonyi kede,

¹⁸pien ibino bedo kede yomcuny ka ce imako a wi mom wil i ye, kun i kare luŋ mom orwenyo i dogi.

¹⁹Man bino miyo iketo genni i kom Rwot; man en gin omio akobo oko baŋi tin.

²⁰Atyeko coyo kop apapat piri, gin pyeradek.

²¹Koppono tye me miyi ŋeyo gin aber dok a tye ateni, man bino miyo idwoko kop kakare ka ce jo oori.

²²Kur ima ginnoro i baŋ acan, pien en mom romo timo ginnoro i komi, dok daŋ kur idi ŋattoro ame peko odio kai ŋolo kop.

²³Pien Rwot bino pido pirgi, te yako kwo ajo ame yako kwogi.

²⁴Kur imak dyere kede jo ame akemogi gwa, kur daŋ imar wot kedgi,

²⁵naka mio yin daŋ ikoporo kiteginono, eka ite moko i owic.

²⁶Kur ibed ŋat ame maro jiŋo jami mere atata, kun icun pi baŋya a jo ocele.

²⁷Pien ka ce gin me culo bino loyi, obino tero anaka itanda me butoni.

²⁸Kur ilok waŋ kiŋa me poko lobo, ame rik kwariwu oketo con.

²⁹Ineno dano ame adiro i ticcere? Dano-nono bino bedo atic ame tio i nyim abaka, en mom bino tic baŋ jo ocele.