Read lango Carokop 23 Bible Online

Carokop 23 - lango bible

Carokop 23

¹Ka ce itye icam wun kede aloccoro, koŋ ipar pi ŋat a tye i nyimi-nono,

²tem diyo miti mogo, kadi bed kec onwoŋo okuto mac i komi.

³Kur imwony lao meicel i cammere a mit wokkono, pien cammono tye calo owic me ciki.

⁴Kur ilol komi pi nwoŋo lonyo, bed ŋat aryek iwek ginnoro bedi.

⁵Pien ka ibedo keto cunyi i kom lim, gire ya oko, twero ya oyot i kare moro keken, calo cur ame oyaro bwome te twarre gire wot oko malo.

⁶Kur icam cam a ŋat awany, kur imwony lao meicel i cammere a mit wokkono.

⁷Pien dano-nono rom aroma i ŋat ame kobbi ni, “Cami, mat on,” kun cunye akolo gin apat i komi.

⁸Bino miyo iŋoko cam amittono iyii oko, kop amit ame ikobo me pwoye te to nono.

⁹Kur ikob koppi baŋ lo amiŋ, pien bino cayo kop me ryeko ame ikobo-nono acaa.

¹⁰Kur ilok waŋ kina me poko lobo a rik oketo con, kur daŋ idony i lobo a jo ame onywalgi oto oko;

¹¹pien ŋat ame lakoro kodi jo-nono tek meicel, en bino pidi pirgi.

¹²Bed ŋat ame keto cunye i gin ame opwonye kede, kun ciko yite i kop ame twero medo ŋecci.

¹³Kur iwek pwonyo atin atidi, pien ka ilebo dude i lut mom twero to.

¹⁴Ka ce ilebo dude i lut, ibino laro kwo mere mom donyo i lyel piny.

¹⁵Atinna, ka ce ryeko tye i cunyi, an daŋ cunya bino bedo yom.

¹⁶Abino lelo meicel, ka ce kop a ya i dogi mwonya.

¹⁷Kur ibed i nyeko i kom obalo, ento myero imedde lworo Rwot kare luŋ,

¹⁸Ateteni, gin oyiko pi kare me anyim gire tye abino, gen ame itye kede mom bino kec nono.

¹⁹Winy ba, atinna, me ibed ryek, mi tammi bed i yo ame itye ka lubo.

²⁰Kur ibed i akina jo a mer i koŋo, akadi i akina oworo me riŋo,

²¹pien omero kede jo owor bino doko ocan, nino anina bino kelligi ruko opeke.

²²Winy kop a pappi ame onywali, kur daŋ ica totti ka doŋ oti.

²³Wil kop me ateni, kur icat oko, wil ryeko, wil daŋ pwony kede niaŋ atut.

²⁴Papa a dano a kite atira bino lelo meicel, ŋat ame onywalo wode aryek, cunye bino bedo yom i kome.

²⁵Mi pappi kede totti bed i yomcuny, mi totti bed kede lelo.

²⁶Atinna, tim ber iwiny gin ame akobbi, kun waŋi neno gin ame an atimo.

²⁷Pien alaya obedo twon bur atut, dako alaya calo bur pii adidiŋ.

²⁸Ŋa ce a can opoto i kome? Ŋa atye cwercuny? Ŋa a da? Ŋa a tye i koko moro?

²⁹Ŋa ame burroro tye i kome kun mom tye ginnoro owane? Ŋa a waŋe obok pee?

³⁰Jo ame ri nakanaka i te koŋo, jo ame woto i bilo kit koŋo apapat.

³¹Kur inen koŋo ka pwod rema, koŋo ame pwod yenyo ayenya i kopo, donyo i kom dano mot.

³²Kodi koŋo-nono kwirrere wuno dano calo kwir a twol, wuno dano calo kwir ororo.

³³Waŋi te cako neno gigi mogo a welo meicel, ite cako tamo gigi mogo a konygi mom.

³⁴Ibedo doŋ calo dano obuto i dye nam, calo dano obuto i wi pagi me mel malo.

³⁵Ibino cako kobo kop atata ni, “Jo ogoa cite mom gire owana, gin opwoda cite mom gire awinyo kadi acel. Koŋo kara bino ya i wia caa adi? Amito dok cako yenyo koŋo me amata.”