Read lango Carokop 24 Bible Online

Carokop 24 - lango bible

Carokop 24

¹Nyeko myero kur maki ikom otim tim areco, kur ipar ni kono ibedo kedgi;

²pien cunygi kolo timo tim me byemi, kopgi opoŋ i kop me timo jo rac.

³Ryeko en amio ogero ot, niaŋ atut mio paco cuŋ atek;

⁴ŋec mio jami me wel, ame yomoro cuny durre meicel i ot.

⁵Dano aryek tye i twer adwoŋ kato ŋat atek; ŋat a tye i ŋec oromo kato atekom oko.

⁶Pien tel me ryeko twero miyo iloo lweny, dok omi-tam ka pol twero miyo jo loo pekogi ducu.

⁷Koppogo me ryeko loo ŋat amiŋ oko, en mom ŋamo doge kadi acel ka jo tye aparo kop a pire tek.

⁸Ŋat ame yiko yik me timo gin arac, olwoŋo ni won acupe.

⁹Roto time me miŋo en bal, jo dag won aŋale.

¹⁰Ka ce idoko agoro i kare me can, nwoŋo tekoni nok.

¹¹Lar jo ame atero me aneka; lar jo ame to obabaŋo oko,

¹²Ka ce ikobo wunu ni, “Wan giwa yam mom oŋeo”; ŋat ame pimo cuny jo mom romo ŋeyo? Itamo ni ŋat ame ŋio gin atye i cunywa mom ŋeo? En mom bino culo dano acel acel kun lubo gin ame en otio?

¹³Atinna, cam moo kic, pien ber, moo kic ame cwer i pedo mit meicel.

¹⁴Ŋe ni ryeko daŋ rom aroma i moo kic, ka ce inwoŋo, anyimmi doŋ ennono, gen ame itye kede mom bino kec nono.

¹⁵Kur ibed buto i te ot a ŋat a kite atira, calo otim tim arac, kur itim timmoro me byemi i paco mere.

¹⁶Pien ŋat a kite atira twero poto tyen abiro, cite ya oko malo, ento atim tim arac can reto oko atwal.

¹⁷Kur ilel ba, ka okworri opoto, kur daŋ ibed i yomcuny ka ce akworri ogatte;

¹⁸naka mio Rwot neno cunye te waŋ, akemo mere te ya oko i kome.

¹⁹Kur ibed i par pi jo a kitegi reco, nyeko kur maki i kom otim tim areco,

²⁰pien dano arac anyimmere pe, tara otim tim areco obino neko oko.

²¹Atinna; lwor Rwot kede abaka, kur ikwer winyo ŋattoro akinagi;

²²pien can ame ya i baŋgi bino poto oyotoyot; myero iŋe kite ame ŋat acel acel acel i akinagi bino jwero kede jo.

²³Magi daŋ obedo koppogo ame jo aryek okobo, Leŋere i ŋolo kop mom ber kadi acel,

²⁴Ŋat ame kobbi atim tim arac ni, “Yin balloro mom i komi,” jo me lobo apol bino ceno, rok luŋ bino dago.

²⁵Ento jo ame juko jo ame timo gin arac bino bedo gigi aber, dok gum bino bedo i komgi.

²⁶Ŋat ame gamo dogi i kop atira, rom aroma i ŋat ame kwako kori kun tye i mar adwoŋ.

²⁷Yik ticci oko con, tyek ticci me poto daŋ oko ducu, eka ite cako doŋ gero odi.

²⁸Kur ibed acaden i kom dano wadwu aboŋo te kop, kopporo me goba myero kur ya i dogi.

²⁹Kur ikob ni, “Abino time kite ame en otima kede, abino cule pi gin ame en otimo i koma.”

³⁰Abeo i ŋet poto a dano a kome wac, i ŋet poto olok a ŋat a wie mom tio.

³¹Nen ba, okuto onwoŋo ocule iye acula, kun tere piny owummere oko ayilayila, aco gweŋe me apama cellere orutte oko piny.

³²Aneno ate bedo lwodo koppere i cunya, nenona-nono opwonya.

³³Koŋ ibut inin giri do, dol ciŋi giri me iwe,

³⁴can bino poto i komi kite ame ayak poto kede i kom dano, kec bino poto i komi calo ŋat ame doŋ orukkere oko me lweny.