Read lango Carokop 25 Bible Online

Carokop 25 - lango bible

Carokop 25

¹Magi en pwony a Culeman ame jo a Kejekia, abaka me Juda ocoo i buk,

²Kwogo Obaŋa kano imun, ento kwogo obakki yabo imun kannaler,

³Kite acalo polo bor ame mom itwero yito tuno iye-ni, dok lobo daŋ tut ame mom itwero kunyo ituco tere, amannono daŋ mom itwero tato tam a tye i cuny obakki.

⁴Kwany cet ryal oko i kom ryal, atet twero teto bedo aber odoco;

⁵kwany jo areco oko i nyim abaka, kom loc abaka bino moko i kite atira.

⁶Kur imiye keni me cuŋ i nyim abaka, onyo me cuŋ i kabedo me dito;

⁷pien bedo ber ka ocwaŋi ni, “Biye ibed kan”, kato ame ocwai acwaa teŋe i nyim oloc.

⁸Gin ame doŋ ineno oko i waŋi, kur iru kelo i nyim okiko; kara ibino timo ŋo icennere ka awoti omii lewic?

⁹Lar koppi-nono wun awotti, wun aryo, dok kur iyab muŋ a ŋat ocele kannaler;

¹⁰naka mio ŋat ame owinyo mii lewic, nyini te bale oko atwal.

¹¹Kop ame okobo i kite ame mitte ikokome, rom aroma i cal jabu ame omwono i kom ryal.

¹²Kop ame ŋat aryek juko kede ŋat a winyo kop, rom aroma atem me jabu onyo gi-kwogo me jabu.

¹³Akwena ame genne calo pee aŋic i kare me kac, baŋ jo ame oore; en dwoggo cuny adwoŋŋere ame oore.

¹⁴Ŋat ame wakere i mot ame en mom omio, rom aroma i pol kede yamo aboŋo kot.

¹⁵Mwolo twero konyi me loyo tam aloc, kop amit mio iloo teko mere.

¹⁶Ka ce inwoŋo moo kic, cam ame oromi keken, naka mio poŋ yii ite dok ŋoko oko.

¹⁷Kur ibed lolo tuŋ awotti alola, naka mio ool kedi oko, te cako dagi.

¹⁸Ŋat ame pido kop me goba i kom awottere, rom aroma i lut me romo, onyo pala bat, onyo atero abit meicel.

¹⁹Geno ŋat a mom genne i kare me can, rom aroma i bedo i laki ame otop, onyo i tyeni ame oŋwalo.

²⁰Wero wer baŋ ŋat a cwercuny onuro oko, rom aroma i ŋat ame kwanyo boŋo i kome oko kun piny ŋic, dok daŋ rom aroma i kado ame oketo i wan bur,

²¹Ka ce kec oneko amoneni, mie cam, ka oryo pii ocire, mie pii mati;

²²Pien ka itimo amano, ibino yido loti mac i wie. Rwotbino culi pi timmono.

²³Yamo ame kodo i tun kide kelo kot, amannono daŋ kwoto jo kelo akemo.

²⁴Bedo i ot ocele akadi mom ber wok, ber kato nywako ot wun i dako ame maro da.

²⁵Amut aber oya i kannabor, rom aroma i pii aŋic ame omio baŋ dano ame oryo pii ociro,

²⁶Dano a kite atira ame ye atim gin arac timo gin arac, rom aroma akoŋ ame coto dwoŋ iye onyo waŋ pii a doŋ oballe.

²⁷Camo moo kic okato kare mom ber, pwoyo jo kare luŋ daŋ mom ber.

²⁸Dano ame mom romo loye kene rom aroma i boma ame oturo ote weko apama cellere luŋ pe.