Read lango Carokop 26 Bible Online

Carokop 26 - lango bible

Carokop 26

¹Woro ŋat amiŋ, rom aroma i pee ame corre i kare me lyeto, onyo kot ame cwe i kare me kac.

²Cen ame oceni kede nononono mom timo ginnoro i komi, calo aculegwec ame twarre te riŋo atata, dok rom aliboro ame twarre riŋo oko.

³Aguragura mito go, kana mito twe doge, dano amiŋ daŋ mito agoa.

⁴Kur idok i kop a ŋat amiŋ kun ilubo kittere me miŋo, naka mio yin daŋ dok ibedo a rom aroma kede.

⁵Dok i kop a ŋat amiŋ kun ilubo kite me miŋo, naka mio en nenne kene ni eryek.

⁶Dano ame oro ŋat amiŋ me tero kwena mere, nwoŋo tye aŋolo tyene kene, kun ayenyo can i kakare.

⁷Carokop ame jo amiŋ kobo, rom aroma aŋwalo ame tyene ogem agema malo.

⁸Dano ame pwoo ŋat amiŋ, rom aroma i ŋat ame tweo gweŋ i atindio atwea.

⁹Carokop ame ŋat amiŋ kobo, rom aroma okuto ame coobo ciŋ amer koŋo.

¹⁰Ŋat ame mio amiŋo moro ata, ticcere onyo amer koŋo, rom aroma i won atero ame wano jo luŋ.

¹¹Dano amiŋ ame medde ameda i miŋo mere, rom aroma i gwok ame lokere ŋano ŋokkere.

¹²Ŋat ame wakere pi ryeko mere en kene, gen ame en tye kede goro kato me a ŋat amiŋ oko.

¹³Anyapo kobo ni, “Eŋatu gire tye i dye yo! Eŋatu gire tye i dye gudo!”

¹⁴Awackom lokkere i kabuto mere, kite ame peta me doggola wire kede tuŋŋi i tuŋŋi,

¹⁵Awackom luto ciŋe i tabo, ento cwalo cam i doge loo oko.

¹⁶Awackom genne kene ni eryek, ame kato jo abiro ame twero dok i peny i ryeko.

¹⁷Ŋat ame donyo i daa ame mom mege, rom aroma i ŋattoro ame mako gwokkoro ata kede yite.

¹⁸Ŋat ame bwolo owote mere kun kobo ni, “An gire aratte arata”;

¹⁹rom aroma apoa ame bao dano i dog mac, onyo ame bao atero ame twero neko dano.

²⁰Yen ka pe, mac to oko, amannono daŋ, ka akwot jo pe, daa gik oko.

²¹Ŋat a maro da, nyao lweny, rom aroma i miri onyo yen ame oonyo i mac okur.

²²Kop akwot jo mit meicel, winyo mit calo mwonyo kwon obwol.

²³Ŋat a kop i doge lim kun cunye col, rom aroma i pala ame opuo i kom gulu lobo, te ryeny aryenya.

²⁴Adag jo lokere aloka i kop i doge, kun kano goba i cunye;

²⁵ka ce en okobo kopporo i kica meicel kur iye, pien okano gigi mogo a mom ber i cunye.

²⁶Kadi bed en kan adage ame tye i cunye, ento timmere arac bino nen oko kannaler i nyim lwak.

²⁷Akuny bur, rette i burrere-nono, aba-gweŋ gweŋŋere-nono dwogo cele.

²⁸Adag jo, dago ŋat ame emito bwalo, kop goba kadi mit kelo ka can keken.