Read lango Carokop 27 Bible Online

Carokop 27 - lango bible

Carokop 27

¹Kur iwakere pi gin ame bino bedo diki, pien mom iŋeo gin ame bino timere i ninonono.

²Jo ocele en a myero pwoi, pe myero ipwoye keni, welo moro en a myero pwoi, pe yin ikomi.

³Gweŋ pek, kwoyo daŋ pek, cite ayela ame ŋat amiŋ kelo pek katogi luŋ,

⁴Akemo gwa, iniga daŋ gwa meicel, cite nyeko rac katogi ducu.

⁵Ŋat ame juki i waŋ ceŋ, ber kato ŋat ame marrere i komi bedo ka i cunye.

⁶Awotti ame mari ka owaŋo cunyi pi mar ame en tye kede i komi, pwod itwero geno, cite akworri ka obolo ciŋe i ŋuti rac meicel.

⁷Ŋat oyeŋ kwero naka kic ame lim wok-ki, ento ŋat ame kec oneko, kadi cam okwok mitte amita.

⁸Ŋat ame oweko paco mere, te wot ata, calli winyo ame oya oweko ode oko.

⁹Moo wir akur yomoro cuny dano, cite peko balo cuny dano abala.

¹⁰Kur iwek awotti kede awot a pappi, kur iriŋ i ot ominni i kare me can, Awotti ame ceggi kedi ber, kato ominni ame tye kannabor.

¹¹Atinna, bed ŋat aryek me cunya bed yom, me wek gamokop a ŋat ame kobo kop arac i koma bed yot.

¹²Ŋat a wie tio neno peko ame abino i nyime te geŋere, ento ŋat ame kwia piny medde ameda anyim naka ka opoto i can,

¹³Gam ruk a dano ka ce en onwoŋo ojeŋo pi baŋya a ŋat ame mom eŋeo, make en ikome ka ce inwoŋo en ocuŋ arok.

¹⁴Ŋat ame lammi awottere gum ibai kun redo kede areda, obino kobo ni en oceno awottere acena.

¹⁵Dako ame daa nakanaka, calo kot ame nido naka ceŋ iyul.

¹⁶Juko kodi dako-nono rom aroma i juko yamo, onyo jolo moo i cuny ciŋ.

¹⁷Nyonyo rabo nyonyo wadgi, dano daŋ twenyo dano wadgi.

¹⁸Agwok oduro camo nyige, ŋat ame gwoko adwoŋŋere, oketo kwogo i kome.

¹⁹Kite acalo inenne keni i pii, amannono daŋ, gin i cunyi nyuto kiteni.

²⁰Lyel me yiko jo oto mom yeŋ, waŋ dano daŋ mom ol i neno piny.

²¹Nyonyo acalo ryal kede jabu otemo i mac, kite a dano ŋeye i kite a jo pake kede,

²²Amiŋo kadi idin anyul onyo alek me odo kal, miŋo mere mom rwenyo i wie.

²³Myero iŋe kite ame rommi tye kede aber, kwa dokki i cunyi ducu,

²⁴pien lim mom perakino nakanaka, loc me lobo daŋ mom ri i doggola acel atwal.

²⁵Kare ame lum doŋ mom nen, lum anyen dok cako tu, ame lum i kor kiddi daŋ doŋ ocoko oko luŋ.

²⁶Yer rommi bino konyi me aruka, dyegi bino konyi me wilo poto;

²⁷cak dyegi bino bedo adwoŋ ame romowu me amata, kun romo jo me odi kede aŋecani luŋ.