Read lango Carokop 28 Bible Online

Carokop 28 - lango bible

Carokop 28

¹Atim gin arac ŋweco aboŋo ŋat ame aryeme, ento ŋat ame cunye atira, cunye tek calo eŋatu.

²Lobo ka oballe, oloccere bedo apipim, cite ka aloccere niaŋ, dok tye kede ŋec oromo, lobo-nono medde bedo i kuc kare alac.

³Acan ame wuno ocan wadgi, rom aroma i kot ame corre balo cam a jo luŋ.

⁴Jo ame weko lubo cik a Rwot, pwoo otim tim areco, ento jo ame gwoko cik a Rwot tye acalo okworgi.

⁵Jo areco mom niaŋ kop kom ŋolo kop atira, ento jo ame cunygi tye kom Rwot niaŋ iye odoco.

⁶Tika ibed acan ame genne, kato bedo alonyo ame kobo kop ogom.

⁷Ŋat ame gwoko cik bedo atin aryek, ento atin ame mako dyere i jo owor mio pappaere lewic.

⁸Ka lonyo obino i ciŋi pi cero jo i mit me nwoŋo agoba, limmi-nono bino kobo oko iciŋ ŋat ame timo ocan kica.

⁹Ka ce dano okwero winyo cik a Rwot oko, kwaccere daŋ bino bedo gin ame Rwot dag winyo.

¹⁰Ŋat ame telo ŋat ame cunye ler iyo arac, bino rette i bur ame en okunyo; ento ŋat ame balloro mom i kome bino nwoŋo jami abeco.

¹¹Alonyo genne kene ni eryek, ento acan ame wie tio ŋeo tammere oko,

¹²Ka ce dano a kite atira odoko aloc, jo ŋatte i twon yomcuny adwoŋ meicel, ento ka ŋat a kite rac odoko aloc, jo luŋ pono oko.

¹³Ŋat ame kano ballere mom twero bedo aber, ento ŋat ame tuco mege oko, te weko, obino timo kica.

¹⁴Ŋat ame lworo Rwot i kare luŋ tye kede winyo, ento ŋat ame cunye nwaŋ bino poto i can,

¹⁵Aloc ame kite rac, ame jo mere ocan, calo eŋatu ame mor onyo ŋuu ame yenyo leyi me amwoda.

¹⁶Aloc ame niaŋŋere nok, wuno jo meicel, ento ŋat ame dag lim ame onwoŋo i yo a mom atira bino ri kare alac.

¹⁷Ka ce bal me remo a dano moro ocele onuo dano moro oko, dano-nono bino ŋwec oko atata tuno waŋ ame oto, ŋattoro myero kur konye.

¹⁸Jo ame tio gin ame tye atira bino bwot, ento jo ame kitegi ogom bino poto i bur.

¹⁹Ŋat ame puro poto mere abup, bino nwoŋo cam abup, ento ŋat ame balo kare mere i gin a konnyere pe, bino bedo i twon can adwoŋ.

²⁰Lonyo bino bedo adwoŋ baŋ ŋat ame genne, ento ŋat ame mito lony oyot mom bino bwot a mom oketo can i kome.

²¹Leŋere i ŋolo kop mom ber, dano twero timo gin arac kom pi kwon aduno moro.

²²Dano ame adur mito ni elony oyot, cite mom niaŋ ni can bino poto i kome,

²³Ŋat ame juko dano wadgi obino pwoyo atek meicel icennere, kato ŋat ame bedo duro doge keken,

²⁴Ŋat ame mao gi-a pappere onyo mea tottere, te kobo ni, “Mannono gire mom bal”, obedo awot a ŋat ame neko jo.

²⁵Ŋat owor nyao lweny, ento ŋat oketo gennere i kom Rwot bino doko alonyo.

²⁶Ŋat ame genne kene, obedo dano amiŋ, ento ŋat ame timo tim me ryeko bino bwot.

²⁷Ŋat ame konyo ocan, lim mom bino rwenyo i ciŋe, ento ŋat ame waŋe wummere oko, bino coko lwak ceŋ apipim.

²⁸Ka ce dano arac ocako loc, jo luŋ pono oko, ento ka loccere ogik, jo a kitegi atira cako nya.