Read lango Carokop 29 Bible Online

Carokop 29 - lango bible

Carokop 29

¹Ŋat ame ojuko kare luŋ kun mom ŋut, bino tur odoco a mom dok ya malo.

²Ka jo a kitegi atira tye i loc, jo luŋ lelo, ento ka jo areco tye i loc, cur ciro jo oko.

³Ŋat ame maro ryeko, yommoro cuny pappere, ento ŋat ame mako dyere olaya, balo limmere abala.

⁴Lobo bedo aber ka abaka ŋolo kop atira, ento ka abaka maro lim ame owile kede i muŋ, lobo bale oko.

⁵Ŋat ame pwoo owote mere nononono, ciko bwo ame tyene en i kome bino moko iye.

⁶Ŋat arac moko i owic me ballere, ento ŋat a kite atira wero kun daŋ lelo,

⁷Ŋat a kite atira ŋeo gin a myero tim pi ocan, ento ŋat a kite rac mom ŋeo ginnoro iye.

⁸Wegi aŋale kelo arubaruba i akina jo i boma, ento ŋat aryek kweo akemo a jo akwea.

⁹Ka ce dano aryeko opyem kede dano amiŋ, amiŋo no, te redo kede nyere aboŋo liŋ.

¹⁰Jo ame maro neko owotegi dag ŋat a balloro mom i kome, otim tim areco mito neke aneka.

¹¹Amiŋo nyuto akemo mere kannaler ento ŋat ame ryek dio cunye mot.

¹²Ka ce aloc maro winyo kop me goba, oticcere adoŋo luŋ bedo timo tim areco.

¹³Acan kede ŋat ame wune gin luŋ acel, Rwot en ame omiogi wangi me neno piny.

¹⁴Ka ce aloc ŋolo kop ocan, kun terogi arorom, loccere perakino kare alac.

¹⁵Goyo atin kede juko, mio atin doko aryek, ento atin ame oweko ata mio tottere lewic.

¹⁶Ka ce otim tim areco tye i loc, bal medde ameda, ento jo a kitegi atira neno kite ame gin poto kede.

¹⁷Pwony atinni con, en bino miyi iwe, bino miyo cunyi bedo yom.

¹⁸Kan ame dano moro pe iye ame niaŋo jo i gin Obaŋa mito, jo iye gak oko, ento ŋat ame gwoko cik tye ked winyo.

¹⁹Kop me dog keken, mom romo pwonyo amiro, kadi bed en niaŋ, ento mom romo keto cunye iye.

²⁰Ŋat ame kobo kop oyot aboŋo koŋ tamo gin ekobo, gen ame en tye kede goro kato me a ŋat amiŋ oko,

²¹Ŋat a pito amiro mere i jami luŋ geye i tino mere, amiro-nono bino doko ale jami mere icennere.

²²Won akemo tubo jo, dok won iniga mio bal bedo dwoŋ,

²³Awaka dwoko dano adwoka piny, ento mwolo mio dano doko ŋat a jo woro.

²⁴A wot a ŋat ame akwo nwoŋo mito nekere kene, en winyo kite ame alammi akwo gum arac cite mom twero tuco.

²⁵Lworo jo mio dano moko i owic, ento ŋat ame geno Rwot bedo kede kuc.

²⁶Jo apol mito ni oloc pwoogi; ento Rwot tero jo ducu arorom.

²⁷Jo a kitegi atira dag otim tim areco, otim tim areco daŋ dag jo a kitegi atira.