Read lango Carokop 3 Bible Online

Carokop 3 - lango bible

Carokop 3

¹Atinna, myero wii kur wil i kom pwony ame apwonyi kede, kur imi cikka rweny oko i cunyi ba;

²pwonya-nono bino miyo ibedo i lobo pi mwakki apol, kun itye i kuc kede lonyo adwoŋ.

³Kur iwek mar kede ateni ya oko i cunyi, tim ber itwegi i ŋuti, coogi kom i cunyi twal.

⁴Mannono bino miyo Obaŋa kede dano pwoyi, dok obedo kede tam aber komi.

⁵Gen Rwot kede cunyi ducu, kur ijeŋere i kom ryeko ame itye kede.

⁶Po pi Rwot i ginnoro luŋ ame itio, en bino miyo yoni bedo apwot.

⁷Kur ibed tamo piri keni ni iryek, cite myero ilwor Rwot, kun iweko timo gin arac.

⁸Mannono bino bedo yat me juko rem i komi, kede gin ame meddi teko.

⁹Nyut woroni baŋ Rwot i ginnoro luŋ ame itye kede, karacel kede cammi ame ogeo cek:

¹⁰mannono bino miyo deroni poŋ i cam adwoŋ, koŋo olok anyen bino bedo adwoŋ okato kare oko.

¹¹ Atinna, pe myero ica pwony a Rwot ba, kur daŋ iol ka ce en bedo juki,

¹²pien Rwot juko jo ame en maro, kite ame apap juko kede wode ame cunye tye i kome.

¹³Ŋat ame tye kede ryeko tye kede yomcuny, karacel kede ŋat ame ŋeo ŋiyo te kop kakare,

¹⁴Pien gin a ya iye aber kato en ame lim kelo oko; dok agoba mere bup kato me lonyo oko.

¹⁵Gin luŋ obedo me wel akato tigo ŋut amimila oko, mom tye ginnoro ame imito ame otwero poro kede.

¹⁶Perakino tye i ciŋe tuŋ cem, eka lonyo kede kwogo te bedo i ciŋe tuŋ cam.

¹⁷Yo mere opoŋ i yomcuny, kuc daŋ dwoŋ iye atek.

¹⁸En obedo yat me kwo baŋ jo ame omako atek, jo ame olido odoco olwoŋo ni wegi yomcuny.

¹⁹Ryeko a Rwot en omio acakki te lobo ocibere; polo daŋ omoko atek odoco pi niaŋŋere atut;

²⁰pii i te lobo ocako kukunya pi ŋec a Rwot; pol daŋ ocako onyo pii i bolo pi ŋeccere.

²¹Atinna, gwok ryeko aber kede ryeko ame mio igwokere i gin ame itio kur imigi orweny oko i baŋi ba,

²²pien bino miyo ibedo i kwo i cunyi, dok acalo rukkoro me kwogo ame iruko i ŋuti.

²³Bino miyo iwoto aboŋo ginnoro ame yeli, aboŋo twomere i ginnoro.

²⁴Mom ibino bedo kede lworo moro ka ibedo piny, ibino nino giri aber meicel ka ce ibuto.

²⁵Kur ibed kede lworo pi cannogo ame poto atura, onyo to ame poto i kom jo areco;

²⁶pien Rwot mom bino rwenyo i ŋeti me gwoki, en bino gwoko tyeni mom moko i owic.

²⁷Kur ikwer timo gin aber baŋ jo ame yin myero ikony, ka ce yin itye kede twer me tiyo.

²⁸Kur ikobbi awoti ni, “Koŋ iwot ite dwogo adwoga, abino miyi diki,” aco kun gin ame en amitonono tye baŋi.

²⁹Kur ibed kede yikkoro me timo gin arac i kom awotti, aco, en bedo i ŋetti kun tye kede gen i komi.

³⁰Kur ipyem i ŋattoro aboŋo te kop, kun en mom otimo ginnoro arac i komi.

³¹Kur nyeko maki i kom lo ame abyemi, kur daŋ ipotto kite moro kadi acel;

³²pien Rwot dag jo ame kitegi ogom, cite en geno jo ame cunygi ler.

³³Rwot ceno paco a jo areco, ento mio gum i paco a jo a kitegi atira.

³⁴Rwot mom mito jo ame oŋale, ento en nyuto kica mere baŋ jo ame mwol.

³⁵En mio jo aryek nwoŋo kwogo, cite omiŋo en miogi lewic.