Read lango Carokop 30 Bible Online

Carokop 30 - lango bible

Carokop 30

¹Magi en kop ame Agur wot a Jake okobo; Aol gira doŋ oko, Ama Obaŋa, aol gira doŋ oko.

²Ateteni, an gira amiŋ meicel, ame mom aporre bedo dano, ŋec ame atye kede mom rom kede me a dano.

³An mom opwonya kede ryeko moro; mom daŋ atye kede ŋeccoro i kom ŋat Acil.

⁴Ŋa ame yam koŋ oyito malo i polo, te dok dwogo piny? Ŋa ame yam ocoko yamo luŋ te mako i cuny ciŋe? Ŋa ame yam oboo pii kede boŋo mere? Ŋa ame omio acakki me wi podo luŋ omoko? Nyiŋ dano-nono ŋa? Nyiŋ wode ŋa? Aniaŋ aber ni yin gire iŋeo!

⁵Kop luŋ ame Obaŋa okobo bedo ateni; en obedo kwot baŋ jo ame riŋo laro baŋe.

⁶Myero kur dok imed kopporo i kom mege, naka mio en juki, ite bedo agoba.

⁷Tye jami aryo ame an akwai iye; ame pe myero itwona kun mom ru ato.

⁸Kwany oko i baŋa kobo kop me goba, kede bwolo jo, kur imia abed acan onyo alonyo, pita icam ame mitte ikokome;

⁹naka mia ayeŋ atek ateka ate kweri oko, kun akobo ni, “Rwot kara en ŋa?” Onyo adoko acan ate cako kwala kwo, ate balo nyiŋ Obaŋana.

¹⁰Kur ibal nyiŋ amiro moro baŋ adwoŋŋere, naka mio en ceni bal te bedo i wii,

¹¹Tye jo ocele ame ceno papagi, mom daŋ olammi totogi winyo.

¹²Tye jo ocele ame nenne kengi ni gin ocil, aco kun cilo pwod onwanne anwana i komgi.

¹³Tye jo ocele ame lyerre meicel, kun otamo ni gin obedo jo amalo meicel.

¹⁴Tye jo ocele ame lakgi odoko gi-lwenygi, lakgi tye acalo pala me romogi, me jwero ocan oko i lobo kede jo ame okonyo akonya ame tye i akina jo.

¹⁵Edike tye kede anyira mere aryo ame gin luŋ okobo ni, “Mia, mia ba,” Tye jami adek a mom yeŋ kadi acel, tye jami aŋwen a mom kobo ni, “Doŋ oromo,”

¹⁶lyel me yiko jo, oraŋa a mom nywal, lobo otwo imek, ame mito pii kare luŋ, kede mac ame kare moro pe koŋ kobo ni, “Doŋ oromo.”

¹⁷Atin ame ŋalo pappere i waŋe, bwono tottere abwona kun mom winyo, winy me kulo bino woto toŋ waŋe oko, acut te camokome oko.

¹⁸Tye jami adek ame malo meicel baŋa; tye jami aŋwen ame mom aniaŋ iye;

¹⁹Yo ame cur beo iye malo i polo, yo ame twol lubo i wi lela, yo ame mel beo iye i dye nam adoŋo, kede kite ame ico bedo i nyako.

²⁰Dako ame alaya bedo kit man, en cemo te weyo doge oko, eka te kobo ni, “An gire mom atimo ginnoro arac.”

²¹Tye jami adek ame myelo kom lobo meicel, tye jami aŋwen ame lobo mom romo kanyo kadi acel:

²²opii ka odoko abaka, kede amiŋo ka ocamo cem oyeŋ;

²³kede dako a jo mom maro ka onyomere, kede aŋeca ka oleo kaka dako a yam loc.

²⁴Tye jami aŋwen i lobo ame mom dito kadi acel, ento gin oryek meicel:

²⁵mori mom tek kadi acel, ento gin ogwoko camgi me acama i kare me oro.

²⁶Anyeri kidi obedo leyi a mom twero ginnoro kadi acel, ento gin bedo i gorogoro;

²⁷bonyo mom tye abaka moro kadi acel, ento gin luŋ ociro i tyen ka owot;

²⁸agwedegwede itwero mako i ciŋi, cite gin obedo naka i pacci obakki.

²⁹Tye jami adek ame woto i yore me aura meicel, tye jami aŋwen ame yon ayona i wot:

³⁰eŋatu ame twergi dwoŋ meicel i akina leyi, ame mom lworo lee moro kadi acel i akina leyi luŋ;

³¹kede twon gweno ame yutte ayuta, karacel kede nyok dyel, kede abaka me yon i wot i nyim jo mere.

³²Ka ce yam imiŋ, ame ipakere keni ni imalo meicel, onyo ka ce yam cunyi opoŋ kede bal, myero koŋ dokicak neno odoco.

³³Pien puyo cak mio moo poto, twinyo wum atek ateka kelo remo, akemo agwa kelo daa.