Read lango Carokop 31 Bible Online

Carokop 31 - lango bible

Carokop 31

¹Magi en tam a pirgi dito ame abaka Lemuel okobo, ame tottere onwoŋo opwonye kede.

²Atinna, kop aŋo ba? Kop aŋo ba, nyodo? Kop aŋo ba, woda ame akwoŋo kwoŋ pire-nie?

³Kur ibal tekoni i kom mon, kur ibal kareni i kom jo ame turo obakki.

⁴Mom gire ber baŋ obakki, atinna Lemuel, obakki gire mom porre mato koŋo, oloc daŋ mom oporre mato koŋo akec akeca,

⁵naka mio mato wigi te wil oko i kom gin a cik okwako, wigi te wil oko i kom jo a can odio.

⁶Mi koŋo akec baŋ ŋat ame doŋ ato oko, kede koŋo olok baŋ jo ame cwercuny ociro.

⁷Migi omat wigi te wil oko i cangi, mom dok ote poo i kom pekogi.

⁸Yab dogi pi jo a lebgi oto, pi jo ame oweko ata,

⁹Yab dogi me iŋol kop atira, gwok gin ame myero tim i kom ocan, kede gin ame myero tim i kom jo ame mito akonya.

¹⁰Ŋa ame twero nwoŋo dako aber odoco? Kodi dako-nono malo meicel, ame kato tigo me wel oko.

¹¹Cware geno atek, en gire mom bino bedo acan.

¹²Dako-nono timo gin aber pire, cite mom gin arac, pi kare luŋ me kwo mere,

¹³En yenyo ka yer rommi kede uci pamba, te tiyo ticcere i yomcuny.

¹⁴Kodi dako-nono rom aroma i mel ocat wil, ame kelo cammere i kannabor.

¹⁵En dilo ibai ame piny pwod col acola, te miyo jo ode luŋ cam,

¹⁶En yenyo poto anyen te daŋ wilo oko, en pito poto olok i lim oya i ciŋe.

¹⁷En obedo atic atek meicel, kome mit meicel i tic.

¹⁸En ŋeo ka cato willere tye awot aber, tara mere mom to dyewor.

¹⁹En wio uci te cweyo boŋo mere kene, en kwoo boŋo mere kene.

²⁰Dako-nono pokki ocan jami mere, konyo daŋ jo ame mito akonya.

²¹En mom bedo i lworo moro i kare me koyo pi jo me ode, pien jo ode luŋ nwoŋo oruko boŋŋi alyet.

²²En kwoo boŋŋi me aruka mere en ikome, en ruko boŋo camanini aber kede en obedo amaramar.

²³Cware ŋeye kene i ka poro kop a pire tek, en neye kene ka obedo i akina odoŋe me bomagi.

²⁴En kwoo boŋŋi me acata, en cato del baŋ ocat wil.

²⁵En tek, jo daŋ wore meicel, en nyero, pien nwoŋo mom tye kede lworo moro i kom gin a tye anyim.

²⁶En kobo koppere luŋ i ryeko, kare luŋ pwonyo pwonnyere luŋ i kica,

²⁷En gwoko jo me ode luŋ aber, en mom bedo abeda kun mom atimo ginnoro.

²⁸Kare luŋ itino mere ya malo te pwoye, cware daŋ pwoc, kun kobo ni,

²⁹“Mon ocele timo jami abeco, ento yin ikatogi luŋ,”

³⁰Tye timmogo amwonya ame bwolo jo, ber a kom daŋ konnyere pe; ento dako ame lworo Rwot myero pwoo.

³¹Dako-nono myero pwoo pi gin a en timo, myero pwoc kan ame odoŋe poro iye kop a pire tek.