Read lango Carokop 4 Bible Online

Carokop 4 - lango bible

Carokop 4

¹Itino, winy wunu gin ame papawu pwonyowu kede, keto wunu cunywu i winyo koppere, me iniaŋ wunu atut;

²gin ame an apwonyowu kede ber, myero kur iwek wunu lubo.

³I kare ame rik an pwod atin atidi, ame pwod atye i ciŋ onywalla, kun pappa kede totta mara meicel,

⁴pappa rik obedo pwonya kun kobba ni, “Mi kop ame an apwonyi kedeni kur rweny i cunyi; kur imi cikka rweny i cunyi ba, me ibed kwo.

⁵Kur imi wi wil iye, kur daŋ iwek gin ame apwonyi kede rweny oko i cunyi. Nwoŋ ryeko kede niaŋ atut.

⁶Myero ibed ŋat ame maro ryeko, pien bino gwoki; myero imare, pien bino gwoki aber.

⁷Gin me agege ame myero ige nwoŋo, en ryeko; ketto cunyi daŋ me bedo kede niaŋ atut a kato jami ducu.

⁸Mar ryeko, pien bino miyi ibedo twon lo moro adwoŋ meicel; ka ce ilido aber, bino miyo jo keto kwogo i komi.

⁹Ryeko bino miyo inwoŋo kwogo aber, bino miyo inwoŋo twon kwogo adwoŋ meicel.”

¹⁰Atinna, myero iwiny koppa, dok daŋ imak i cunyi, me wek iperakino i lobo kare alac.

¹¹An atyeko pwonyi doŋ oko i yo me ryeko, atyeko nyutti doŋ yo aber me aluba.

¹²Ginnoro gire mom bino riye i nyimi i kare ame itye ka wot; ginnoro daŋ mom bino twomo tyeni i kare ame iŋwec.

¹³Gwok gin ame apwonyi kede atek, kur imi rwennyi; gwok aber meicel, pien mano en kwoni.

¹⁴Kur ilub yo jo areco, dok daŋ kur ilub kite otimo tim areco,

¹⁵Wek yo-nono, kur ilubi; pokere oko i yo-nono ite kato giri,

¹⁶Pien gin gigi mom onino ka mom ru otimo ginnoro arac; nino remogi ka mom ru omio ŋattoro opoto i bal.

¹⁷Timo gin arac yeŋogi calo cam, tim me byemi mittigi calo koŋo olok ame gin omato.

¹⁸Ento yo a jo a kitegi atira ryeny medde ameda, ame ryeny atek tuno ka piny doŋ odoko aler,

¹⁹Aco yo a jo areco col icuc calo dyewor; ka ce ogatte mom daŋ oŋeo gin odipogi.

²⁰Atinna, myero iketo cunyi i winyo gin ame apwonyi kede; tim ber iwiny kop ame an akobo,

²¹kur imi rweny oko i tammi ba, gwok aber meicel i cunyi,

²²Pien kelo kwo baŋ jo ame onwoŋo, dok doko yat me caŋo komgi.

²³Gwokere i kom tam ame itamo i cunyi, pien kwoni ocuŋ ka i gin ame yin itamo,

²⁴Kur ibed kobo koppogo a mom atira, kopporo a mom tye kakare myero kur ya i dogi,

²⁵Cik waŋi cuŋ atira i kom gin ame tye i nyimi, kur ilok waŋi kannoro ocele.

²⁶Keto cunyi iyo ame iwot iye keken, mannono bino miyo gin ame itiyo ducu bedo atira.

²⁷Pe igak tuŋ cem onyo tuŋ cam; ento myero kur itim gin arac.