Read lango Carokop 5 Bible Online

Carokop 5 - lango bible

Carokop 5

¹Atinna, keto cunyi me winyo kop me ryeko ame akobbi, cik yiti me winyo niaŋ atut ame atye kede,

²me wek ibed ŋat ame ryek, me kop ame ya i dogi bed ame nianere.

³Pien kop ame ya i dog dako ame alaya lim calo kic, koppere mit calo moo;

⁴ento i agikki mere doko kec calo ipio, bit calo pala bat.

⁵Dako-nono bino teri naka ito; yo ame en lubo woto piny i lyel.

⁶En gire mom paro pi lubo yo ame tero jo i kwo, en bedo lubo yo atata kun nwoŋo mom ŋeo ka elubo yo ame omito.

⁷Doŋ ba, atinna, aman doŋ myero iwiny koppa, myero kur wi wil lubo kop ame akobo.

⁸Yin myero ibed bor i dako ame alaya, kur daŋ itun i doggola me ode;

⁹naka bino miyo oworo jo ocele kakari, eka jo a mom okica te neki oko, kun kare me toni mom ru oromo;

¹⁰naka mio lo moro ata nya i lonyoni oko, eka gin ame ibedo tic atek pire, te kobo oko i udi a jo ocele.

¹¹Bino miyo icur atek i kare me toni, i kare ame riŋo komi doŋ ojuŋere oko;

¹²bino miyo ikobo ni, “Piŋo kara rik akwero winyo pwony ame opwonya kede, ate cayo daŋ juk ame ojuka kede?

¹³Mom abedo winyo gin ame opwonnya rik pwonya kede, akwero tero yita oko baŋgi.

¹⁴Aco koŋ doŋ inen kite ame nyiŋa doŋ rac kede baŋ jowa luŋ ame ocokere karacel.” Gum ame ibino nwogo pi bedo kede dakoni keken

¹⁵Mat pii me taŋini keken, kede pii ame molo i akoŋŋi.

¹⁶Kur imi pii me taŋini mol oko teŋe, kur imi poŋ atata i dye yo.

¹⁷Gwok bed meri yin keni, ento kur imi bed me konyo jo ocele.

¹⁸Gum myero bed i kom dakoni, yii myero bed ayom i kom dakoni ame inyomo i kare me tinoni,

¹⁹waŋ pii aber en dakoni amwonya ame kweo cunyi, ber a dakoni myero bed ame yomoro cunyi i kare ducu, marrere myero lo kwoni me kare luŋ.

²⁰Atinna, piŋo kara iweko dako ame alaya loo kwoni oko? Piŋo kara ber a dako ocele en ame dok yomoro cunyi?

²¹Pien Rwot neno kwo a dano acel acel, en neno kan ame en woto iye luŋ.

²²Bal a lo arac tye acalo owic me cike, bal ame en timo-nono en ame en dok moko iye,

²³En bino to pien mom romo jukere kene, pi twon miŋo adwoŋ ame en tye kede, mio en rwenyo oko.