Read lango Carokop 6 Bible Online

Carokop 6 - lango bible

Carokop 6

¹Atinna, ka ce icikere me culo baŋya awotti, ka ce iye jeŋo giri moro pi ŋattoro a mom iŋeo;

²Kop ame ikobo-nono nwoŋo doŋ odoko owic piri, nwoŋo doŋ imoko oko kop ame oya i dogi,

³Pi mannono ba, atinna, myero itim kit man, me ilarre, pien yin nwoŋo itye ite twero awoti-naca. Myero iru wot baŋe, me ibak dogi, me en gonyi oko.

⁴Kur inin ba, kur imi waŋi ba;

⁵lar kwoni calo atil ame laro kwo mere i baŋ twon adwar oken, kite ame winyo twarre kede oko iyi tol adwar,

⁶Yin awackom myero inen kite ame mori tio kede; nen gin ame gin tio aber me ibed aryek.

⁷Gin tye kede rwottoro ame kwaogi, mom daŋ otye i kit atelloro ducu me loyogi,

⁸gin yiko camgi kuro kare me oro, ocoko kit cam apapat i kare ame jo tye akayo kac,

⁹Kara yin awackom ibino bedo buta abuta pi kare arom mene? Ibino co i waŋ nino awene ba?

¹⁰Koŋ ibut inin giri do, dol ciŋi giri me iwe,

¹¹can bino poto i komi kite ame ayak poto kede i kom dano, kec bino poto i komi calo ŋat orukere oko me lweny.

¹²Lo arac ame kwo mere mom ber, bedo rimo piny i kop me goba,

¹³kun mimio waŋe atata, coo-gu piny i tyene, cicimo daŋ piny atata i nyako ciŋe.

¹⁴Kodi dano-nono cunye col kun opoŋ i tam areco keken, atub jo kare luŋ.

¹⁵Kodi dano-nono can poto i kome atura, te tur odoco a mom dok romo ya malo.

¹⁶Rwot dag jami aromo abicel, tye jami abiro a Rwot mom mito atwal.

¹⁷En dag lo ame bwono jo i waŋe, dago ŋat ame kobo kop me goba, kede ŋat ame neko jo a mom i balloro.

¹⁸En dago lo a cunye opoŋ i tam me timo gin arac, kede ŋat ame ru yutte ayuta me wot timo gin a mom ber.

¹⁹En dago acaden ame kobo kop me goba kare ducu, kede lo ame ticcere obedo me tubo omego.

²⁰Atinna, gwok cik ame pappi ociki kede, kur daŋ ikwer gin ame totti opwonyi kede.

²¹Pwonygi-nono myero bed i cunyi kare ducu, tim ber itwe oko i ŋuti.

²²Pwonygi-nono bino bedo gin ame teli i wotti, dok bino gwoki kare luŋ ka ibuto piny, bino daŋ kop kedi ka doŋ ico i waŋ nino,

²³Pien cik tye acalo tara, aco pwony te bedo calo ceŋ, pwony me juko dano en obedo yo me kwo,

²⁴ame konyi me gwoki i kom mon a kitegi reco, kede mon ame kobo kop amit me waya tammi,

²⁵Kur imi ber a kodi monnono bwoli ba, akadi miyo nenogi wayo tammi.

²⁶Alaya omio ka ogati acel keken ote codo kede, ento codo dako a lo ocele twero balo kwo a dano ikome.

²⁷Dano twero kwanyo mac te keto i kore, eka mac mom te waŋo boŋo mere?

²⁸Onyo dano twero wot i kom mac i keno, eka tyene mom te waŋ?

²⁹Kodi cannono daŋ nen i kom lo ame woto buto i dako awottere; mom tye ŋattoro ame gudo dako awottere te bwot a mom cannono opoto i kome.

³⁰Jo mom cao akwo ka okwalo cam me acama, pi cobo mittere, kare ame kec nwoŋo oneko?

³¹Aco ka ce omako, en culo waŋe tyen abiro twal, culo waŋe i jami me ode luŋ.

³²Lo a timo codo cot obedo dano a wie mom tio, lo atimokodi timmono nwoŋo onekere kene.

³³Gin a dano-nono nwoŋo en awano kede lewic, lewiccere mom bino rwenyo atwal.

³⁴Pien nyeko mio dano ger atek, dano mere ka oero lweny mom jukere,

³⁵En mom ye ni cule kadi acel, akadi imi twon mot arom mene akemo mere mom kwe.