Read lango Carokop 7 Bible Online

Carokop 7 - lango bible

Carokop 7

¹Atinna, myero wii kur will koppa, kan cik ame apwonyi kede luŋ calo lonyo a pire dit.

²Myero kur wii wil i cikkono me ibed kwo, gwok gin ame apwonyi kede, kite ame igwoko kede, toŋwaŋi.

³Kur imigi orweny i ciŋi ba, coogi kom i cunyi twal.

⁴Kobbi ryeko ni, “Yin ibedo aminna”, aco niaŋ atut myero ilwoŋ ni twon awotti ame imaro.

⁵Mannono bino konyi me gwoki i kom dako ame alaya, kede loyo tam a mon ame kobo kop amit me bwoli.

⁶Pien i kare ame abolo waŋa oriŋo naka oko twal,

⁷ate neno naka lwak awobe atino a mom i ŋeccoro kadi acel, waŋa te cop i kom awobi moro i akinagi kuno, awobi ame wie mom tio kadi acel.

⁸En onwoŋo tye awot i yo i ŋet ot a dako-nono, en te lubo yo ame woto i ode,

⁹wi otyeno ka ŋa beo-nu, iwor ame piny doŋ odoko acol oko.

¹⁰Nen ba, dako moro te rwatte kede, kun orukere calo alaya ikokome, dok cunye onwoŋo opoŋ i kop amit me bwolo co.

¹¹En onwoŋo dako a mom a lewic kadi acel, ame woto atata, tyene mom mito bedo paco;

¹²irwatte kede i yo i caa-ni, ŋit dok ineno icuk, mom rwenyo iyi akari yo pi kuro co.

¹³Ka oneno ico obino, poto i kome te donyo jwiyo leme, kun lewic mom i wie, te kobbe ni,

¹⁴“An tin ayalo Rwot i mot aŋola, acobo daŋ cikere me kwoŋŋa oko;

¹⁵en woki doŋ atye ayenyi, ayenyi meicel, ber doŋ anwoŋi.

¹⁶Atyeko doŋ peto cuka moro aber i kabutona, cuka ame raŋi mere mwonya meicel, ame akelo i Miciri.

¹⁷Aonyo daŋ twon moo moro akur meicel i kabutona, akikiro moo murra kede cinaman-gu iye.

¹⁸Bye owot oyomoro cunywa iye naka odiko; me ocob mitwa kede yomcunywa.

¹⁹Cwara gire tin pe, owoto gire oko i weno kannabor.

²⁰En omako cao limmere owoto kede, en adwogo paco ame dwe doŋ oleŋere oko.”

²¹Dako-nono te bedo bwobwolo lo-nu kun wae momot i kop amit, naka te loyo tammere oko.

²²Oyotoyot ico te cako lubo yo dakonono oko, calo twon ame apeyo wot neko,

²³onyo twon apoli ame omoko i bwo, tuno waŋ ame atero ocobo emanyere pel, calo winyo ame ariŋo wot moko i tol; en mom ŋeo ni kodi timmono bino miyo erwenyo kwo mere.

²⁴Aman doŋ ba, wun itino, winy wunu koppa, keto wunu cunywu me winyo kop ame akobbiwu.

²⁵Cunywu myero kur bwolwu me lubo kodi kit a dako-nu, kur igak, ilub yore;

²⁶pien dako-nu omio co apol oto; nen ba, twoni co ame en oneko pol ata.

²⁷Ot ame en bedo iye-nu obedo doggola me donyo piny i lyel; obedo yo ame tero jo naka i to.