Read lango Carokop 8 Bible Online

Carokop 8 - lango bible

Carokop 8

¹Koŋ iwiny wunu kite ame ryeko tye alwoŋo kede, niaŋ atut daŋ amito ni winy dwone.

²I wi tur luŋ ame tye i ŋet yo, en nwoŋo tye ocuŋ i dye yo luŋ;

³i dog cel me donyo i boma, en nwoŋo tye alwoŋo i ŋet doggola me boma ni,

⁴“Wun jo, an alwoŋowu do, an alwoŋo jo luŋ aluŋa.

⁵Wun jo a mom ryek, bed wunu jo oteggo ba, wun jo amiŋ, keto wunu cunywu ba,

⁶Winy wunu kop abeco ame akobbiwu, kop luŋ ame an abino kobo obedo kop ame tye atira,

⁷pien kop ateni keken en abino donnyo i doga, leba kwero kobo kop ame mom tye kakare.

⁸Kop ame an akobo luŋ obedo kop ame tye atira, mom tye moro iye ame odwalle onyo ame ogom.

⁹Koppa luŋ tye atira baŋ ŋat ame niaŋ atut, winyere aber baŋ jo ame tye i ŋec oromo.

¹⁰Gam wunu gin ame an apwonyowu kede akaka gamo lim, yer wunu ŋec akaka yero lonyo.

¹¹Ryeko malo meicel kato gigi mogo me wel oko, mom tye ginnoro ame imito wunu ame oromo poro kede.

¹²An aryeko ame atye i niaŋ atut meicel, atyeko nwoŋo daŋ ŋec dok aneo gwoko,

¹³Ŋat a lworo Rwot, dag timo gin arac. An adag awaka, dworre ken, adag yo ame tero dano i timo gin arac, karacel kede kobo kop a mom atira.

¹⁴Atye kede twer me yiko tam kede me keto i tic, atye i niaŋ atut kede teko.

¹⁵An en akonyo oloc i ticgi me loc, an en amiogi oketo cik a tye atira.

¹⁶Kit aloccoro luŋ me lobo nwoŋo kony i baŋa, karacel kede odoŋe luŋ me wi lobo.

¹⁷An amaro jo ame mara, jo ame yenya i tekogi luŋ nwoŋa gire.

¹⁸Lonyo kede kwogo nwoŋere baŋa, lonyo kede perakino, karacel kede kwo aber meicel.

¹⁹Gin ame inwoŋo wunu i baŋa ber kato jabu oko, kadi jabu ame olio acil meicel, kato akadi ryal ame oyero ayera.

²⁰An alubo yo me kite atira, ame en yo ame oŋolo iye kop kakare,

²¹amio lonyo baŋ jo ame mara, kun amio lim poŋ apoŋa i udi me kano limgi.

²²“Rwot ogeo keta i kare me cako ticcere, en ogeo tiya an ryeko.

²³I kare aconnaca rik ogeo keta an kena, con meicel ame mom ru oketo lobo.

²⁴An ageo bedo tye ame nam adoŋo daŋ pwod pe, pii me akoŋ daŋ onwoŋo mom ru ocako mollo oko.

²⁵An ageo bedo tye ame kiddi-gu daŋ pwod pe, lobo obedo tutur-gu daŋ pwod pe,

²⁶kare ame Obaŋa mom ru oketo lobo kede potti luŋ iye, akadi apua ame ogeo bedo tye i lobo.

²⁷I kare ame en keto polo onwoŋo an doŋ atye, ame egoo lain omano nam adwoŋ,

²⁸ame en mio polo cuŋ i kabedo mere malo, kun mio wan pii tutuca i nam adoŋo.

²⁹I kare ame en rik keto kan ame nam myero gik iye, me pii kur mol atata me balo cikkere, kede i kare ame keto acakki me te lobo ducu,

³⁰an onwoŋo daŋ atye, kun atye i ŋete acalo adiro me tic,

³¹kun alelo atek meicel pi bedo i lobo ame en oketo, cunya daŋ onwoŋo yom meicel i kom otino a dano.

³²Doŋ aman ba, wun itinona, winy wunu koppa, jo ame lubo yora bedo jo a cunygi yom.

³³Winy wunu gin ame opwonyo me ibed wunu aryek, myero kur ikwer wunu pwonyere ba,

³⁴Jo ame winyo koppa bedo jo ame cunygi yom, nino i nino obedo kuro gigi dogcella, kun obedo i doggolana nino ducu.

³⁵Ŋat ame onwoŋa, nwoŋo doŋ onwoŋo kwo, cuny Rwot bino pwoye;

³⁶ento ŋat ame pe onwoŋa, nwoŋo owane gire oko kene, ŋat ame daga nwoŋo maro to.”