Read lango Arabkop 10 Bible Online

Arabkop 10 - lango bible

Arabkop 10

¹Lwaŋi oto mio moo wir a ŋwece kur doko aŋwe oko, amannono daŋ, miŋo aduno pek kato kwogo kede ryeko.

²Cuny aryeko wiro wonnere dwoko tutuŋ cem, ento me amiŋo wiro wonnere dwoko tutuŋ cam.

³Amiŋo kadi bed tye alat i yo, wie nwoŋo mom atic, en mio jo luŋ ŋeo ni en ebedo dano amiŋ.

⁴Ka ce akemo omako aloc i komi, kur i ya i kabedoni, kare ocele twero timi kica ka ce i bedo mot i twon bal adwoŋ ame onwoŋo timo.

⁵Tye tim arac ame aneno piny i te ceŋ kan, ame aneno calo bal ame oya i baŋ aloc.

⁶Jo amiŋ otye ka miyo kabedo me dito i loc, kun olonyo mom oparo pirgi.

⁷Aneno opii ame tye ka ŋwec aguragura, kun rwode tye awot i tyengi calo pii.

⁸Akuny bur rette i bur ame ekunyo, twol kao ŋat ame maro tuco kor apama.

⁹Apaa gweŋe, gweŋ wano; abar yen, yen wano.

¹⁰Ka leb lee okuku, eka mom ote rabo, ŋat ame atic kede myero ti kede i tekkom; cite ryeko konyo dano me tiyo i tic kakare.

¹¹Ka ce ororo okao dano kun mom ru omio yattoro me miyo doko mwol, kony me miyo twollono doko amwol doŋ mom tye.

¹²Kop ame ya i dog ŋat aryek mio jo pwoc cite kop ame ya i dog ŋat amiŋ neke aneka.

¹³Kop ame geo ya i doge bedo kop me miŋo, eka te giko koppere calo ŋat a wie oballe.

¹⁴Amiŋo duro kop apol apola, kadi bed ŋattoro mom ŋeo gin ame bino timere. Kara ŋa ame bino kobbi dano gin ame bino timere anyim.

¹⁵Amiŋo lolle i tic ame olo kome aola, ame te miyo yo a woto tuŋe rwenye oko,

¹⁶Lobo ame abaka mere pwod awobi bino neno can, ame rwode mere dilo camo aramagi ibai.

¹⁷Tye kede gum, lobo ame abaka mere obedo wot a ŋat ame oworo, ame rwode mere camo aramagi i kare aber arama me medo teko, cite mom me mito mero.

¹⁸Wackom mio wi ot rwobere, ŋinnyere mio wi ot cwer.

¹⁹Cam mio jo nyero, koŋo kelo yomcuny, lim mio dano nwoŋo gin emito luŋ,

²⁰Kur icen abaka i cunyi, kur daŋ icen alonyo i wi tandani iyi iciskani; pien winyo ame twarre malo bino tero dwoni, onyo olikkoro twero tuco koppono oko.