Read lango Arabkop 12 Bible Online

Arabkop 12 - lango bible

Arabkop 12

¹Po daŋ pi ŋat oketi i kare me tinoni, kun kare arac mom ru obino, kun mwaka ame ibino kobo iye ni, “Cunya mom yom kadi acel i ginnoro luŋ;” mom ru onoko ceggi,

²kun ceŋ, lero, dwe, acer, mom ru odoko acol, dok kun pol daŋ mom ru owumo polo i ŋe cwe a kot;

³i nino ame jo ame kuro ot komgi bino myel kun jo a yam tek doŋ ogogoma oko, lak doŋ mom romo nyamo cem, pien nwoŋo daŋ doŋ otum oko iyi dogwu, waŋwu daŋ doŋ ocido oko, ame mom romo neno piny aber,

⁴ame del dogwu doŋ orwobere oko. I kare ame mom doŋ iromo winyo wunu koko a kidi rego, dok koko a winy keken daŋ coowu oko i waŋ nino, kun daŋ doŋ mom iromo winyo wunu dwon naŋa ame agoyo onyo dwon jo ame awer.

⁵I kare ame ibino lworo wunu kabedo luŋ ame otiŋere malo, kun ilworo wunu wot i yo oko. Yer wiwu bino nwoŋo doŋ okwor kia, ame doŋ Iwaye wunu awaa i wot, kun mituwu me mon doŋ otum odoco. Pien jo luŋ bino wot i pacogi ame obino bedo iye nakanaka, jo bino kok i dye yo.

⁶Tol bino cot oko, tara jabu bino rette te tur oko, onyo gulu pii bino ŋidde oko, tol wayo pii i bur atut bino cot daŋ oko.

⁷Komwu bino dok i yi apua, kan ame rik onwoŋo tye iye con, kun tipowu dok baŋ Obaŋa, kan ame rik oya iye.

⁸Arabkop te kobo ni, mannono ducu konnyere gire mom, konnyere gire mom atwal.

⁹Kite acalo Arabkop onwoŋo obedo dano aryek, en obedo pwonyo jo i gin ame tye kede ŋec atut. En otemo pimo carokop, oŋiogi te canogi i yore i yore,

¹⁰Arabkop otemo yenyo koppogo ame twero yomoro cuny jo, en te coyo gin ame tye ateni i cuny aler.

¹¹Kop a jo aryek bit calo ecipet onyo ocumal ame ogo i wi ot odonyo atek. Obaŋa ame en akwatwa adwoŋ ame omiogi koppere-nono luŋ.

¹²Atinna, gwokere kur ibed lolo komi i koppogo ocele akato magi. Coyo buke mom bino gik, kwan atek ateka balo kom dano nono.

¹³I ŋe kobo kop ocele luŋ, koppa me agikki ene: Bed i lworo baŋ Obaŋa, dok daŋ myero ilub cikkere, pien mannono en gin a myero dano ti.

¹⁴Pien Obaŋa bino ŋolo kop i kom ginnoro luŋ ame dano otio, akadi gin otimere i muŋ aber onyo arac.