Read lango Arabkop 4 Bible Online

Arabkop 4 - lango bible

Arabkop 4

¹Dok ate neno kite ame dano tye ka wuno kede dano wadgi piny i te ceŋ kan. Nen ba, aneno pig waŋ jo ame owuno tye aony irat, cite mom tye ŋattoro ame twero kweyo cunygi! Aco kono jo ame wunogi-nono tye i teko adwoŋ meicel ame ŋattoro mom tye ame twero konyogi.

²Man omio atamo ni jo ame oto gigi oko, jo-nono komgi i gum meicel ame kato jo ame pwod tye kwo.

³A doŋ kato magi-nono luŋ, en aye dano ame mom ru onywalo, ame waŋe mom ru oneno tim areco ame tye ka timere piny i te ceŋ kan.

⁴Aneno daŋ ni gin omio jo tio tic atek i twon diro meicel, pien ŋat acel acel mito ni elo jo ocele i jami luŋ. Man daŋ konnyere pe, rom aroma i ryemo yo yamo.

⁵Amiŋo dolo ciŋe te miyo kome neno can tuno waŋ oto.

⁶Tika ibed kede jami ame opoŋ ciŋi acel keken, kun itye i kuc i cunyi, kato ame ibedo lolle i jami ame opoŋ cini ryoryo, ame daŋ rom aroma i ryemo yo yamo.

⁷Tye dok gin ocele ame aneno ame konnyere mom i te ceŋ piny kan,

⁸Lo a mom tye kede dano mere moro, wode onyo ominnere, cite bedo lolle; tic aboŋo weo, dok daŋ waŋe mom koŋ yeŋ i lim a doŋ tye i ciŋe, cite mom koŋ penyere kene kene ni, “Kara pi ŋa ba ame an abedo lolle i tic pire-nie, ame geŋa bedo kede yomcunnyie?” Man daŋ aneno ni konnyere mom, obedo tic a mom kelo yomcuny kadi acel.

⁹Jo aryo ber kato dano acel, pien gin romo tiyo ticcoro ame kelligi ginnoro abeber.

¹⁰Pien ka ce gin opoto, ŋat acel bino tiŋo awottere malo. Ento ŋat ame tye kene, ka opoto, mom dok tye ŋattoro ame romo tiŋe malo, dano-nono tye kede can.

¹¹Dok medo kede mannono, jo aryo ka obuto karacel, komgi bedo amomor; kara dano acel twero nwoŋo lyeto i yore aŋo?

¹²Kadi bed akwor twero loyo ŋat ame tye kene, cite jo aryo bino loye oko. Tol ame owio i yore adek mom cot oyotoyot.

¹³Awobi aryek kun acan ber kato abaka oti, amiŋ, ame mom don romo ye tam ame omie,

¹⁴kadi bed en onwoŋo oya i ot kol te doko aloc onyo onywale ame acan i lobo ame en loo-nono.

¹⁵Aneno jo luŋ ame kwo ame tye piny i te ceŋ kan, karacel kede en awobi-nono ame bino leyo kakarenono;

¹⁶aneno ni jo mere pol a mom kwanne, cite awobi-nono onwoŋo loogi luŋ. Kadi bed amannono, jo ocele ame bino Jubogi mom bino bedo kede lelo i kom awobi-nono. Ateteni, man daŋ konnyere mom, rom aroma i ryemo yo yamo.