Read lango Arabkop 5 Bible Online

Arabkop 5 - lango bible

Arabkop 5

¹Gwokere ka iwoto i ot woro Obaŋa. Wot i nyim Obaŋa me wot winyo koppere ber kato jo ame yalo Obaŋa i motgi miŋomiŋo, kun mom oŋeo ni otye otimo gin arac.

²Kur iru ŋamo dogi, kur daŋ imi cunyi myel i kobo gin ame tye i cunyi i nyim Obaŋa, pien Obaŋa tye i polo, ento yin itye i lobo. Pi mannono ba, myero kur idur kop apol apola.

³Pien lek bino i tic apol meicel; dwon ŋat amiŋ duro kop adura.

⁴Ka ce kwoŋo kwoŋŋoro baŋ Obaŋa, myero iru cobo oyot, pien cuny Obaŋa mom yom i kom kop me miŋo. Myero icob gin ame ikwoŋo pire.

⁵Ber ka ibedo ame mom ikwoŋo kwoŋŋoro, kato ame ikwoŋo eka mom ite cobo gin ame ikwoŋo.

⁶Kur imi dogi mi ipot i bal, dok daŋ kur ikob i nyim akwena Obaŋa ni dogi rik ocer acera, Piŋo kara imio cuny Obaŋa waŋ i kop ame oya i dogi, eka te balo tic ame itio oko?

⁷Pien ka lek medde ameda, kop a konygi mom durre adura, cite yin myero ibed kede lworo i kom Obaŋa.

⁸Kur ibed kede wur ka ce i loba moro-ni ineno oloc iye tye ka wuno ocan, kun mom daŋ oŋolo kopgi kakare, dok mom oterogi acalo dano; pien aloc adwoŋ iye tye kede aloc ocele adwoŋ katte ame tye ka nene, dok daŋ tye en ocele ame loogi ducu.

⁹Cite akato ducu, abaka tye kede kony adwoŋ meicel i loba ame jo puro.

¹⁰Ŋat ame maro lim lim mom romo; ŋat ame maro lonyo daŋ agoba mom romo; man daŋ konnyere mom.

¹¹Ka ce lim omedde i ciŋi, yo me keto mere daŋ nya medde ameda; Kara doŋ kony aŋo ame won limmono nwoŋo iye? Mom nwoŋo ka yomcuny me bedo neno anena?

¹²Apakaca nino meicel kadi bed ocamo kwon aduno onyo abup; ento lim abup geno alonyo nino.

¹³Tye twon timmoro arac meicel ame aneno tye ka timere piny i te ceŋ kan; dano moro-ni twero kano limmere te dok kelle peko,

¹⁴limmere-nono te rwenyo oko i yore a mom ber kadi acel. Aco kono won limmono nwoŋo tye kede wode, ginnoro mom nwoŋo odoŋ i ciŋe.

¹⁵Kite ame rik en odonyo kede i yi tottere, en kite ame en dok bino dok kede. En rik obino onoro, bino dok daŋ onoro, kun mom tero ginnoro, aboŋo ginnoro ame oya i kom ticcere ame ebedo lolle kede,

¹⁶Man daŋ obedo twon timmoro arac meicel ame tye ka timere. Kite ame en rik obino kede i lobo, en ame en daŋ bino dok kede. Kara doŋ kony aŋo ame danonono onwoŋo me bedo lolle i yamo nono,

¹⁷kun obalo kare mere luŋ i piny acol, kun cunye cwer, dok akemo kede par ociro oko, dok kome-gu daŋ mom yot?

¹⁸Nen ba, gin ame an doŋ aneno ni tye aber ame porre me atima, en aye me camo cem kede matte, dano myero onwoŋ yomcuny pi lolle mere ame ebedo lolle kede i te ceŋ piny kan, pi kare me kwo mere anonok ame Obaŋa omie, pien mannono keken en ame obedo gin ame otyeko pokkere.

¹⁹Dano ducu ame Obaŋa omio lonyo kede gum me bilogi, kede ye gamo gin ame opokke, kun nwoŋo yomcuny i gin ame ebedo lolle iye. Man obedo mot ame Obaŋa en omio.

²⁰Pien dano-nono mom bino po wok i kom kare me kwo mere i lobo, pien Obaŋa omio en opoŋ i yomcuny i cunye i kare luŋ.