Read lango Arabkop 6 Bible Online

Arabkop 6 - lango bible

Arabkop 6

¹Tye dok tim ocele arac ame aneno piny i te ceŋ kan, ame odio dano meicel.

²Obaŋa twero miyo dano moro-ni lonyo, lwak jami apipim, kede kwogo, kun mom dok tye ginnoro ame en mito ame nwoŋo mom tye baŋe, cite Obaŋa mom dok te miye gum me bilogi, ento dano moro ata en ame dok te lunyo bilo. Man daŋ konnyere mom meicel, dok obedo twon burroro ame lit meicel.

³Ka ce dano onywalo itino mia acel twal, te daŋ perakino i loba kare alac, ame mwakki ame en operakino kede i lobo bup atek, cite en dano-nono mom te bilo jami abeco me kwo man, eka mom daŋ dok ote yiko dano-nono, an aneno ni atin ame obwogo abwoga tye aber kato dano-nono oko.

⁴Pien obino i yore a mom konyo te kato gire oko i piny acol, kan ame nyiŋe te rwenyo oko iye.

⁵Medo i kom mannono, en gire mom oneno ceŋ, mom daŋ oŋeo ginnoro; ento owe gire aber ame kato dano ca oko.

⁶Kadi bed dano naca onwoŋo perakino i lobo pi mwakki ame romo tutumia aryo twal, ce en mom obilo yomcuny me gin abeco i kwo man, atin ame obwogo abwoga loc gire oko, Mom gin aryo luŋ owoto i kabedo acel.

⁷Lolle ame dano lolle kede luŋ tye pi yie, kadi bed amannono, mittere mom gik.

⁸Kara kony aŋo ame ŋat aryek nwoŋo ame kato jo a mom ryek? Kara kony aŋo ame acan ame ŋeo kite ame myero ebed kede i akina lwak tye kede?

⁹Ŋat ame mio jami ame etye kede romme tye aber ame kato ŋat ame tammere mom cuŋ mot pi bedo paro jami atata, Man konnyere gire mom, rom aroma i ryemo yo yamo.

¹⁰Ginnoro luŋ ame timere i lobo, nwoŋo rik Obaŋa oyiko pire con, dok kite ame dano tye kede-ni daŋ gire ŋeye, kede kite ame en mom romo pyem Obaŋa ame tek kate oko.

¹¹Duro kop apol apola mom konyo ginnoro kadi acel. Kara gin aŋo ocele aber akato ame dano nwoŋo iye?

¹²Kara ŋa ame ŋeo gin ame ber pi dano i kare me kwo mere anonok, ame konnyere-gu daŋ pe, dok ame en kato iye akata calo tipo? Kara ŋa ame twero kobbi dano gin ame bino timere piny i te ceŋ kan i kare ame en doŋ mom iye?