Read lango Arabkop 8 Bible Online

Arabkop 8 - lango bible

Arabkop 8

¹Ŋa kara ame calo lo aryek? Dok ŋa ame ŋeo gonyo te kopporo keken? Ryeko mio waŋ dano lilia meicel, cunye ame nwaŋ daŋ te cako lokere oko.

²Myero ilub gin ame abaka ociko, kun cunyi mom poto pi kwoŋŋi acil ame ikwoŋo.

³Ya oko i nyim abaka, ka kop tye arac myero iru ya oko i nyim abaka, pien twero timo ginnoro keken ame cunye omito.

⁴Kop ame abaka okobo obedo kop me agikki, kara ŋa ame dok romo penyo abaka ni, “Kara itimo ŋo-nono ba?”

⁵Ŋat ame gwoko cik mom twero rwatte i peko moro, dok ŋat aryek bino ŋeyo kare kede yo ame myero elub.

⁶Kop acel acel tye kede kare mere kede yo mere daŋ, kadi dano tye kede twon cannoro ame odie rom mene.

⁷Pien en mom ŋeo gin ame bino bedo tye; kara doŋ ŋa ame twero titte kite ame bino timere kede?

⁸Mom tye dano moro ame tye kede twer me gwoko tipo mere, onyo ame tye kede twer me geŋo to mere ka ce nino me to mere oromo. Mom gire tye yo moro me bwot i lwennyono, dok jo ame timo tim areco daŋ mom bino larre pi timgi areco-nono.

⁹Man luŋ an aneno, kun amio tamma bedo i kom ginnoro luŋ ame tye ka timere piny i te ceŋ kan, kan ame jo ocele tye kede twer, kun jo ocele tye ka neno can i te twergi-nono.

¹⁰Icennere dok ate neno otim tim areco ame oyiko i lyel; gin onwoŋo obedo timo timgi areco-nono i kabedo acil, cite jo daŋ pwoogi i boma ame gin rik obedo timo iye tim areco-nono. Man daŋ konnyere mom.

¹¹Jo bedo keto cunygi i timo tim areco pien kop ame oŋolo i kom otim tim areco mom oketo i tic oyotoyot.

¹²Kadi bed abalo tim tim arac tyen tutumia, kun daŋ pwod medde perakino i lobo, cite an aŋeo ni jo ame lworo Obaŋa bino bedo aber, pien gin otye kede lworo i nyime.

¹³Cite jo ame timo tim areco mom gire bino bedo aber, mom daŋ obino perakino i lobo kare alac, pien gin mom tye kede lworo i nyim Obaŋa.

¹⁴Gin ame tye ka timere i lobo kan obedo gin ame konnygi mom meicel. Nen, tye jo mogo ame kitegi atira, ame gigi mogo timere i komgi kite ame timere kede i kom otim tim areco, dok tye jo mogo ame otim tim areco, ame gigi mogo timere i komgi kite ame timere kede i kom jo a kitegi atira. An akobo ni man daŋ konnyere mom.

¹⁵Man omio an akobo ni dano gire myero bed ka i yomcuny, pien mom dok tye ginnoro ocele aber pire piny i te ceŋ kan, kono ka camo cem kede matte, kun eyomoro i cunye, Pien man en gin ame bino bedo timere nakanaka i kare me lolle mere ame ebino lolle kede i te ceŋ piny kan, pi kare me kwo mere ame Obaŋa omie.

¹⁶Kare ame amio wia ocako tic me neno ryeko, kede me neno gin ame tye ka timere i lobo kan, kite ame jo ocele bedo ame waŋgi okwekere akweka dyecen kede dyewor, omio aniaŋ i tic Obaŋa odoco, aniaŋ ni kadi bed dano yelle i yore aŋo me yenyo, mom twero niaŋ tic Obaŋa ame tye ka tiye i te ceŋ piny kan. Kadi bed lo moro aryek yiye ni en eŋeo, mom gire twero roto kadi acel.