Read lango Arabkop 9 Bible Online

Arabkop 9 - lango bible

Arabkop 9

¹Man luŋ akano i cunya kun atye ka ŋiyo luŋ, kite ame jo a kitegi atira kede jo aryek tye kede i ciŋ Obaŋa, karacel kede ticgi. Ka ce marrere ennono, onyo adage mere, dano gire mom ŋeo. Ginnoro luŋ i nyimgi konnyere mom,

²kite acalo tye gin acel ame poto i komgi gin ducu, poto i kom ŋat a kite atira kede i kom atim tim areco, i kom dano aber kede i kom dano arac, i kom ŋat a cik ogeno kede i kom ŋat a cikkoro mom ogeŋo, i kom ŋat a yalo Obaŋa i mot kede i kom ŋat a mom yalo Obaŋa kadi acel. Kite ame dano aber tye kede, en ame acan daŋ tye kede. Ŋat ame kwoŋo kwoŋ rom aroma i ŋat ame lworo kwoŋ.

³Man en gin arac ame tye ka timere piny i te ceŋ kan, tye gin acel ame poto i kom jo luŋ. Cuny dano daŋ opoŋ i tim areco, apoa daŋ tye i cunygi i kare ame gin tye kwo; i ŋe mannono, gin doŋ woto oko baŋ jo oto.

⁴Ento ŋat ame kwo i lobo a jo ame tye kwo, tye kede gen, pien gwok akwo ber kato eŋatu oto.

⁵Pien jo akwo ŋeo ni gin obino to, cite jo oto mom ŋeo ginnoro, dok daŋ mom dok tye ginnoro pirgi. Wi jo wil oko i komgi.

⁶Margi, adagegi, kede nyekogi doŋ oto oko, ginnoro mom dok tye pirgi i kom ginnoro luŋ ame tye ka timere piny i te ceŋ kan.

⁷Wot icam giri cammi kun cunyi yom, imati daŋ koŋoni kun cunyi yom; pien Obaŋa otyeko pwoyo gin ame itio.

⁸Myero rukki bed atar odoco i kare luŋ, kun moo mom rwenyo i yer wii.

⁹Bil jami me kwo-ni cutu i dako ame imaro, i kare luŋ me kwoni a konnyere pe-ni, ame Obaŋa omii me bedo kede piny i te ceŋ kan, pien mannono en megi ame opokki me yomoro cuny i kare me kwoni pi tic ame ibedo lolle iye piny i te ceŋ kan.

¹⁰Ti gin ame ciŋi ocop iye kede tekoni luŋ, pien lyel ame iwot iye, tic onyo tam, onyo ŋec, onyo ryeko mom tye kuno.

¹¹Dok daŋ aneno ni piny i te ceŋ kan, jo adwir meicel mom en ame loo tuko, jo atek mom en a loo lweny. Jo aryek mom tye i jami ame romogi i kwo man, mom opwo jo ame odiro; cite gin ame timere i komgi lubo kare kede kit ame gum aber kede arac poto kede i kom dano acel acel.

¹²Mom tye ŋattoro ame ŋeo kare mere. Jo daŋ rom aroma i rec ame moko i bwo pi gum arac, kede winyo ame moko i tol. Ociko jo kede owic i kare arac, eka owic te poto i komgi atura.

¹³Atyeko neno kodi ryeko man kun otimere piny i te ceŋ kan, ame nyuto kop i kom ryeko, ame an aneno ni obedo twon anennoro amalo meicel.

¹⁴Boma moro atitidi onwoŋo daŋ tye iye jo anonok, twon abaka moro atek te bino me bino lweny iye, eka te guro daŋ oko, te gero twon celloro atek guro kede oko.

¹⁵Ento i yie kuno rik tye iye acannoro ame ryek, en ate laro bomagi-nono i ciŋ okwor pi ryeko mere. Cite ŋattoro mom te po pi acannono.

¹⁶An akobo gira ni ryeko gire ber kato tekkom oko, kadi bed jo cao ryeko acan ca, kun daŋ mom owinyo koppere.

¹⁷Kop a ŋat a ryek ame jo owinyo momot ber kato redo oloc i akina jo amiŋ.

¹⁸Ryeko ber kato jami lweny, cite bal acel balo gin abeco apol atata.