Read lango Wer a Culeman 1 Bible Online

Wer a Culeman 1 - lango bible

Wer a Culeman 1

¹Wer a Culeman ame mit atek meicel kato wer luŋ.

²Koŋ inotta ba lema kede doga, pien mar ame imara kede mit kato koŋo olok oko.

³Moo wirri kur meicel, nyiŋi kom mom rwenyo i dog jo, mannono omio anyira luŋ mari.

⁴Wek awot kedi kun owoto oyotoyot. Abaka okela doŋ naka iyi icika mere, Myero koŋ olel kun cunywa yom atek i komi, obino pako marri ame kato koŋo olok oko; jo gire marri kakare.

⁵An acol kono, cite anen iye aber meicel, wun anyira me Jerucalem; acalo kom kema me cedar, aber kom calo boŋŋi me icika a Culeman.

⁶Kur ibed nena wunu pi del komani, pien lyeto a ceŋ omio koma ocido oko. Akemo onwoŋo omako omegona meicel i koma, gin te miya tic me kuro poto olok, aco kun poto olokka bedo kene.

⁷Koŋ doŋ ikobba ba, yin ame amari wok-ki, ikwao rommini kara kwene? Dyeceŋ gin we kwene? Pien pe myero imia abed calo arim piny, kun abebea akina rommi owoteni.

⁸Ka ce mom yin oŋeo, yin nyako amwonya meicel, koŋ yin ilub yo rommi, me iwot ikwa dyegini, i ŋet kema okwat.

⁹Yin ibedo mega ame amaro, yin kom irom aroma i min aguragura, ame riŋo i gadigadi a Parao.

¹⁰Lemi neno ber atek, pien iketo iye gigi mogo me kwogo, ŋuti daŋ amannono, pien iruko iye tigo wel ame oyupo i tol.

¹¹Obino yiko gi-kwogo me jabu piri, kun odeo i tigo ame otio i ryal.

¹²I kare ame abaka tye aweo i wi rwot oollere, moona a ŋwece kur te cako kuto atek meicel.

¹³Ŋat ame amaro-nono pire litta acalo icao murra ame mom rwenyo i laŋeta.

¹⁴Ŋat ame amaro-nono pire litta calo ature ame ŋwece kur meicel, ame turo i potti olok ame tye i En-gedi.

¹⁵Koŋ inen ba, yin nyako ame amaro-ni, yin iber meicel; yin gire imwonya meicel, waŋi kom calo me amam.

¹⁶Koŋ inen ba, yin lo-ni ame amaroni, yin iber meicel; ateteni, neni yomoro cunya okato kare.

¹⁷Obino weo kedi i wi lum alyabu, yen me arii odwa obedo yen cedar, wi odwa opeto iye bao me ciprec.