Read lango Wer a Culeman 3 Bible Online

Wer a Culeman 3 - lango bible

Wer a Culeman 3

¹I kare ame abuto i wi tandana dyewor, abedo paro dyera ame amaronono; abedo yenyo, naka mom ate nwoŋo; alwoŋo, mom daŋ te gamo doga.

²Ate kobo ni, “Aman doŋ abino ya wot yenye i boma luŋ, abino yenye i yo kede bar-gu; an abino medde yenyo ŋat ame cunya maro-nono.” Cite ayenyo naka mom ate nwoŋo.

³Okur-piny te ŋolle i koma, i kare ame onwoŋo gin tye alolono dye boma. An ate ŋolle penyogi ni, Ineno wunu dyera ame amaronie?

⁴I kare ame akatogi anonok i ŋea, ate cop i kom dyera ame amaronono oko, Akwako ŋute nakanaka kun mom aye ni wot dok kannoro, tuno ka akele naka i ot a totta, naka iyi icika imatta ame rik oyaca iye.

⁵Acikowu atek, wun anyira me Jerucalem, kun akwoŋo akwoŋa i nyiŋ leyi me tim, kur itwar wunu marwa, tuno ka kare oromo.

⁶Ŋo ame tye ka bino i tuŋ tim cae, ame calo yito aduny, yito ame oya i murra kede odok a ŋwece kur ame owaŋo, ame kur calo gigi mogo a ŋwecgi kur ame ocat-wil cato?

⁷Koŋ inen wunu ba, gin otiŋo itanda me tiŋo Culeman! Jo atek ilweny pyerabicel daŋ tye a lwoke, ame gin obedo twoni jo atek meicel iyi Icrael.

⁸Gin luŋ odiro meicel i lweny i pala, dok daŋ ona meicel i lweny; ŋat acel acel tye otweo pala lwennyere i pyere, me kuro gin ame timere dyewor.

⁹Abaka Culeman rik otio i itanda mere, kun otio i bao ame oya i yen me Lebanon.

¹⁰Yen ame tye acalo pagi mege, en rik otio kede ryal, ŋeye te bedo jabu, eka kom bedo mere te wumo oko i boŋo obedo amaramar, aco yie ote kwogo atek meicel, kun anyira me Jerucalem en okwogo kittono, pi mar ame onwoŋo tye i cunygi.

¹¹Wun anyira me Cion, wot wunu ba, koŋ inen wunu abaka Culeman. Nen wunu tok kwogo ame tottere oketo i wie, i nino me nyomere acil, i nino ame opoŋ i lelo.