Read lango Wer a Culeman 4 Bible Online

Wer a Culeman 4 - lango bible

Wer a Culeman 4

¹Koŋ inen ba, yin nyako ame amaro-ni, yin iber meicel; yin gire imwonya meicel. Waŋi kom calo waŋ amam ka aneno i ŋe boŋo ame igeŋo i waŋi. Yer wi kom calo lwak dyegi, ame aciro aluŋere i luŋ me Gilead.

²Aco laki te tar calo yer kom megi rommi atar, ame oya i kan ame olwokogi iye, kun gin luŋ ogoo ka rude keken, ame pwod omworo yer komgi amwora, dok atin a romo i akinagi daŋ mom orwenyo.

³Del dogi te rema pee calo uci arema, dogi neno ber atek, lemi te nen calo nucu okwer pomegranat, ka kom aneno i ŋe boŋo ame iwumo kede waŋi.

⁴Aco ŋuti te nyedde malo aber calo gedo a Daudi ocuŋ malo iguŋ, ame ogero me kano jami lweny, ame oŋabo iye kwode abeco ame romo tutumia twal, ame gin luŋ obedo kwode olweny.

⁵Tuŋino aryo luŋ bergi calo itino amor aryo, calo kom itino aryo ame obedo rude, ame tye acem i akina kalaŋweka oturu.

⁶Abino bedo gira i wi kidi me odok murra, kede i wi tur me odok luban, tuno ka yamo me odiko doŋ ocako kodo aŋic, tipo daŋ doŋ orwenyo oko.

⁷Mom tye dul komi moro ame aneno rac, ama dyera ame amaro yin gire iber odoco.

⁸Aterana we, oya doŋ oko i Lebanon, owoti, owot karacel, wan aryo kedi, oya oko i Lebanon. Yitto doŋ piny i wi kiddi me Amana, yitto piny i wi kidi me Cenir kede me Kermon, oya oko i kan ame adu eŋatu tye iye apipim, oya oko i wi kiddi ame kwace odurie iye wok-ki.

⁹Cunya doŋ gire megi, aminna, aterana, nenoni kede tigo i ŋuti-nu a doŋ omio cunya luŋ tye gire i ciŋi,

¹⁰Marri oneka i mwonyo lao oko, ama aminna, aterana! marri kato gire koŋo olok oko, ŋwec mooni te kur ame kato kit ginnoro luŋ akur.

¹¹Aterana, dogi lim calo kic, moo kic kede cak tye gire i te lebi, ŋwec boŋŋini te kur calo ŋwec kidi me Lebanon.

¹²Yin gire ibedo potona, ama aminna, aterana, yin ibedo potona ame ocelo oko, yin ibedo akoŋ ame doŋ omwono doge oko pira.

¹³Yin i potona ame okwer pomegranat doŋo iye, dok yen ocele abeco meicel nyak iye, ame ature iye kur atek dok moo yen iye daŋ kur,

¹⁴kite moo apapat ame ŋweogi kur kede cinamon, kede kite yen apapat me odok luban, murra kede moo mogo ame ŋwecgi kur, kede kit yen ocele mege me wel.

¹⁵Yin ibedo waŋ akoŋŋa, kulo ame ya iye pii me kwo, kulo ame pii mere mol i wi kidi me Lebanon.

¹⁶Cak doŋ kodo ba, yin yamo me anyarodi, biye ba, yin yamo me anyarolum! Kod ba i potona, me ŋwece cak duny i kabedo ducu. Dyera ame amaro myero gire doŋ bin i poto mere, me bin cam nyig yen abeco ame tye iye.