Read lango Wer a Culeman 6 Bible Online

Wer a Culeman 6 - lango bible

Wer a Culeman 6

¹En ŋat ame imaro-nono kara owoto kwene? yin nyako aber meicel i akina anyira luŋ-ŋi? Olubo kara yo mene ba? Kobbiwa me okonyi yenyo.

²Dyera ame amaro-nono olubo yo poto mere, kan ame yen a ŋwecgi kur tye iye. Owoto kwayo rommi mere i potti kuno, dok tye daŋ apwono tur kalaŋweka.

³An abedo me a dyera ame amaronono, en daŋ mega; en kwao rommi mere i akina kalaŋweka.

⁴Dyera we, yin iber meicel, icalo boma me Tirja, berri calo ber a Jerucalem, neni iyiliyili calo neno mony ame otiŋo benderagi.

⁵Lok waŋi teŋe, kur ibed nena, pien tye ka yelo wia meicel. Yer wii kom calo lwak dyegi, ame aciro aluŋere i luŋ me Gilead.

⁶Aco laki te tar calo yer kom megi rommi atar, ame oya i kan ame olwokogi iye, kun gin luŋ ogoo ka rude keken, dok atin a romo i akinagi daŋ mom orwenyo.

⁷Lemi te nen calo nucu okwer pomegranat, ka kom aneno i ŋe boŋo ame iwumo kede waŋi.

⁸Mon ame abaka onyomo anyoma tye pyerabicel nono, aŋeca tye pyeraboro nono, aco anyira mom romo kwanne kadi acel.

⁹Awelena ame amaro tye i akinagi acel keken, en obedo nyako acel keken ame tottere onywalo, kite ber meicel, dok tottere maro atek. Anyira ocele ka onene, doŋ olwoŋe ni ayomcuny, mon anyoma kede aŋeca daŋ amannono, gin luŋ opake apaka.

¹⁰“Man kara ŋa ame nen calo rupiny-nyie? Ame cil calo dwe, dok ryeny aryenya calo ceŋ-ŋie? Ame neno iyiliyili calo mony ame tiŋo benderagi-ŋie?”

¹¹Awoto tu piny i poto amaido, me wot neno kite ame oturo kede i luŋ kuno, awoto daŋ neno ka olok doŋ ocako lot oko, kede ka okwer pomegranat doŋ ocako turo oko.

¹²Cite ame an mom ru aŋeo gin ame onwoŋo atimere, apo anwoŋo ni doŋ atye i wi gadigadi malo, kun abedo i ŋet aloc.

¹³Dwog cen, dwog cen ba, yin nyako Culam, dwog ba cen, koŋ idwog cen me oneni. Pino kara imito neno wunu nyako me Culam, calo nyan ame amyel i nyim dul mony aryo twal?