Read lango Wer a Culeman 7 Bible Online

Wer a Culeman 7 - lango bible

Wer a Culeman 7

¹Tyeni neno ber atek iyi amuk, ama, nyaka adwoŋ, Amuruni oŋwel calo tigo ŋut alilia, calo kom gin ame dano adiro en otio.

²Peni calo tabu agura, ame koŋo olok mom rwenyo i yie. Yii calo ŋano ame ocoko oyido karacel, kun kalaŋweka oguro dyere.

³Tunoni aryo luŋ, berrere calo itino amor aryo, calo itino aryo ame gin rude,

⁴Aco ŋuti te nyedde malo aber calo gedo me lak lyec, ame ocuŋ iguŋ malo. Aco waŋi calo kulo me Kecbon, ame tye i dogcel me Bat-rabbim. Eka umi te nyedde calo ot ocuŋ malo iguŋ ame tye i Lebanon, ame otikere kede Damaciko.

⁵Wii kwogi meicel calo kidi me Karmel, yer wii te lot abeco calo boŋo obedo amaramar; neno yer wii-nono omio abaka odoko calo abuc.

⁶Dyera we, pe iŋeo kite ame berri yomoro kede cunya, yin i nyako ame imio yomcuny ocira oko,

⁷Yin kom icalo yat otit, tuno i kori daŋ te luŋere calo etak otit.

⁸An akobo ni abino yito otit, ate mako jaŋe pwono nyige. Ama, tunoni kono kom obedo calo etak olok, kun weoni kur calo nanaci,

⁹ame ka imuŋo i yita, awinyo calo mwonyo koŋo olok amit, ame ka imato donyo gire mot amota, kun kato gire mot i dog kede i akina lak.

¹⁰An abedo me a dyera ame amaro mittere luŋ tye i koma,

¹¹Biye ba, yin dyerra ame amaro-ni, me ibin owot karacel i pottt kuca, me owot obut i akina myere,

¹²ote dilo idiko con wot i potti olok, me owot onen ka olok doŋ ocako lot oko, ka ce turgi doŋ oyabere oko, kun okwer pomegranat doŋ oturo oko. Abino nyutti marra kuno.

¹³Ŋwec yat nywal tye aduny akur meicel, kit yen luŋ abeco ame oyero ayera tye i doggolawa, en aconnege kede en anyennege; gin luŋ agwokogi kannono ce yomoro cunyi, yin dyera ame amaro.