Read lango Wer a Culeman 8 Bible Online

Wer a Culeman 8 - lango bible

Wer a Culeman 8

¹Kono kom onwoŋo yin ibedo calo ominna, ame idoto cak i kor totta. Kono onwoŋo ka arwatte kedi, koŋ anoto lemi, kun ŋattoro gire mom romo caya.

²Onwoŋo aromo teli, teri naka i ot a totta, naka atot iyi icika ame rik oyaca iye, Onwoŋo aromo miyi koŋo akur meicel i te mato, kede koŋo okwer pomegranat ame abio.

³Ateno wia i ciŋe tuncam, kun ciŋe tuŋcem okwa ko kora.

⁴Acikowu atek meicel, wun anyira me Jerucalem, kur itwar wunu marwa, tuno ka kare oromo.

⁵Maca ŋa ame tye abino tuŋ tim cae, ame ojeŋer i kom dyerrere ame emaro cae? An a rik acol i poto nanaci. Rem me nywal rik ogoo totti kuno i kare me nywali, en rik te bedo yelle i rem me nywal kuno.

⁶Mia kur arweny i cunyi calo anen ame oruko i ŋut, acalo atem ame irwako i ciŋi pien mar tek calo to, nyeko te ger calo lyel, tyer calo leb mac, leb mac ame lyel atek meicel.

⁷Kadi pii adwoŋ rom mene, mom gire romo kweyo mar, kadi alele opoŋ rom mene, mom romo mwonyo mar. Ka ce alonyo moro otemo wilo mar i limmere luŋ ame etye kede, jo bino cayo atek meicel.

⁸Wan otye kede aminwa atidi mire, tuno mere mom ru ogulo. Ka ŋo ame obino timo pi aminwanono, i nino ame lo moro bino penyo?

⁹Kono aminwa-nono onwoŋo tye acalo apama me cel, kono onwoŋo ogero apama cel ocele me ryal i kome; aco kono en onwoŋo tye acalo dogcel me boma, kono onwoŋo ocego oko i bao me cedar.

¹⁰An rik abedo apama me cel, tunona onwoŋo calo gedo ocuŋ iguŋ malo; en onwoŋo doŋ nena caa luŋ, acalo ŋat ame kelo kuc.

¹¹Culeman rik tye i poto olokkere Baal-amon; en onwoŋo omio poto olokkerenono i ciŋ jo a gwoko; ame dano acel acel i akinagi culo baŋi lim me ryal tutumia acel pi olok ocek iye.

¹²An tye i poto olokka, ame obedo mega an kena; yin Culeman giri itwero tero tutumia acel, eka jo ame gwoko te tero mia aryo.

¹³Yin ame ibedo i potti-ni, owotena mito winyo dwoni; koŋ ikob me awiny dwoni ba,

¹⁴Ru bino baŋa ba, yin dyera ame amaro, biye ibed calo amyem, onyo acalo atin atil, ame bedo i wi kiddi ame yen a ŋwecgi kur doŋo iye.