Read lango Icaya 1 Bible Online

Icaya 1 - lango bible

Icaya 1

¹Man en gin ame Obaŋa onyuto baŋ Icaya wot Amoj i kom Juda kede Jerucalem i kare a Ujjia, Yocam, Akaj kede Kejekia ame gin obedo obakki me Juda.

²Koŋ iwiny, yin polo, ter yitti yin lobo; pien Rwot doŋ okobo ni, “Apito itino awobe, amiogi odoŋo, ento gin doŋ ojem oko i koma,

³Twara twon ŋeo ŋat ame loc kede kan ame adwoŋŋere mie iye cam; ento Icrael mom gire ŋeo, jona mom gire niaŋ.”

⁴Koŋ inen ba, rok man ocerre acera i bal, gin obedo jo ame bal gire onuogi oko, ikwae otim tim areco, itino ame kitgi doŋ oballe oko! Gin doŋ otyeko weko Rwot oko, ocao doŋ Ŋat Acil me Icrael oko, kun odok gigi cen atek ateka.

⁵Piŋo kara pwod dok imito wunu ni medde goyowu? Dok piŋo imedde wunu ameda i jem? Nen bur doŋ odurre adura i dye wiwu ducu, cunywu daŋ doŋ goro agora.

⁶Cakere i tyenwu piny tuno kede i wiwu malo, kannoro aber iye mom tye kadi acel, awaŋo kede bur odurre adura iye, ame burrogo iye pwod tye acwer acwera; kun mom obio tut iye, mom daŋ otweo waŋgi, akadi bido waŋgi kede moo.

⁷Lobowu doŋ yie nono, bomawu doŋ owawaŋo oko mac: orok omao lobowu oko kun ineno wunu, lobowu doŋ odoŋ yie nono a calli lobo ame orok oyako.

⁸Owekoboma me Cion odoŋ calo gony ame oweko i poto olok, dok calo gaŋo ame oweko poto okwer, calo doŋ boma ame mony otyeko guro oko.

⁹Koŋo Rwot me mony mom owekkiwa jo moro odoŋ, kono wan obedo calo Codoma, kono nyo doŋ ocalo Gomora.

¹⁰Winy wunu kop a Rwot, wun oloc me Codoma! Ter yitwu i pwony Obaŋawa, wun jo me Gomora! Rwot okobo:

¹¹“Motwu ame oŋolo apipimmono kara konnyere ŋo baŋa? Rommiwu ame oŋolo me awaŋa doŋ opuo cunya oko, karacel kede dwol me limwu ocwe mege; cunya gira mom yom i kom remo akadi me rommi onyo me dyegi.

¹²“Ka ibino wunu i nyima, Ŋa okobo ni inyonyono wunu dyekalla?

¹³Kur imedde kella wunu mot a konyere mom, yito odok akur odoko gin me kwer baŋa, Por a dwe, kede cabit, kede lwoŋo jo i cokere, mom atwero kanyo balwu i cokerewu adoŋo.

¹⁴Por dwewu kede ecubaŋwu ame ociko pirgi, gin luŋ okwero gira cunya oko; odoko doŋ yec apek meicel baŋa, yeyogi doŋ oola gira oko.

¹⁵Ka itaŋo wunu ciŋwu, abino wumo gira waŋa oko, mom anenowu; kadi bed ikwaa wunu tyen apol ata, mom abino winyo gira kwacwu; pien ciŋwu remo keken.

¹⁶Koŋ ilwokere wunu, ibed wunu acil, cwa wunu timwu areco oko teŋe me kur dok bed nen i nyima,

¹⁷ite daŋ weka wunu timo gin arac oko, pwony wunu timo gin aber. Lub wunu ŋolo kop atira, kony wunu jo ame owuno; lar wunu pi itino kic, pid wunu pi mon a coggi oto.

¹⁸“Koŋ doŋ ibin wunu ba, me obin olar wunu kop karacel, kadi bed balwu doŋ rema arema, bino doko atar calo pee; kadi bed orema calo pala, bino doko calo yer romo.

¹⁹Ka ce iye wunu kun itye wunu kede winy, ibino camo wunu gin abeco ame ocek i lobo.

²⁰Aco ka ikwero wunu kun daŋ ijem wunu, pala lweny bino tyekowu oko; pien man Rwot ikokome en okobo.”

²¹Kite ame boma ame yam genne doŋ odoko kede alaya, boma ame rik ŋolo kop atira dwoŋ iye! Dok kite atira daŋ onwoŋo tye iye, cite aman doŋ nek keken.

²²Ryalwu doŋ rom aroma i cet ryal, koŋo olokwu doŋ orubere oko i pii,

²³Olocwu doŋ odoko jo a jem, aco owotegi te bedo okwo. Ŋat acel acel i akinagi maro lim ame owile kede i muŋ, cunygi tye ka i mot. Gin mom olaro pi itino kic, pido a mon a coggi oto mom gire tuno i nyimgi.

²⁴Mannono omio Rwot, ame en Rwot me mony, Rwot ame en Won Twer me Icrael okobo ni, “Oromo doŋ, cunya doŋ bino kwe i kom jo a daga, abino culo kwor i kom okworra.

²⁵Abino loko ciŋa adwoggo i komi; abino twatwako cet ryalli oko, abino liyo, abino miyo kit raccoro luŋ gwarre i komi.

²⁶Abino dwoko oŋolkoppi kite a rik tye kede con, kede jo ame mii tam kite a rik tye kede iyi ageyi. I ŋe mannono, ote doŋ lwoŋi ni boma ame kite atira, boma ame genne.”

²⁷Obino lakoro Cion pi ŋolo kop a jo luŋ arorom, jo iye ame oŋut obino lakorogi pi kitegi atira.

²⁸Cite jo ame jem kede obalo obino neko oko karacel, aco jo ame weko Rwot oko, obino daŋ jwero oko.

²⁹Pien lewic bino makowu i kworo ame ilelo wunu iye-nono; alee bino twodowu pi pottiwu ame opito kede yen ame doŋ ityeko yero wunu.

³⁰Pien wun ibino doko wunu acalli kworo ame pote oner, dok daŋ acalli poto ame pii pe iye.

³¹Lo atek bino doko acalli lum otwo ka mac ogudo, kede ticcere daŋ acalli mac otyer; gin aryo luŋ obino waŋ karacel, kun mom dok tye ŋattoro ame neko mac.