Read lango Icaya 10 Bible Online

Icaya 10 - lango bible

Icaya 10

¹Jo ame keto cik a mom atira bino neno can, kede ocoo kop ame mio owuno jo,

²ame mio ogeŋo ocan oko i ŋolo kop atira, dok ame mio omao jami ocan ame tye i akina jona, ame miogi oyako jami a mon a coggi oto, dok miogi daŋ oyako jami itino kic.

³Kara ibino timo wunu ŋo ba i nino me keto can i komwu, i dye yamo ajuru ame bino ya i kannabor? Kara ibino riŋo wunu baŋ ŋa ba me konyowu? Kara en lonyowu-nono ibino weko wunu kwene?

⁴Yo moro gire bino bedo pe, kono ka ŋoye i akina obuc, onyo to atoa keken i akina jo ame oneko. Magi luŋ mom gire bino kweyo akemo a Rwot, ciŋge pwod tye ame oryeye aryea.

⁵Jo Acuria obedo lut me nyuto akemona, kede abiro me nyuto inigana.

⁶Abino cwalogi i kom rok okwero woro Obaŋa, abino cikogi owoto i kom jo ame akemo omaka i komgi, pi yako jamigi kede coko jamigi ame oyako ote jejebo piny i dye yo calo coto.

⁷Ento jo Acuria gire onwoŋo mom oyikere me timo kittono, dok daŋ onwoŋo gire mom otamo i cunygi, ento tamgi onwoŋo tye ka me jwero rok apol, me miyo nyiŋgi rwenyo oko.

⁸Pien en okobo ni, “Odoŋe me monnya luŋ mom obedo obakki?

⁹Kalno mom rom aroma kede Karkemic? Kamat mom rom aroma kede Arpad? Camaria mom rom aroma kede Damaciko?

¹⁰Ciŋa doŋ ogudo kede loc me woro jogi ame cal jogigi opao apaa rik kato maca ame tye i Jerucalem kede i Camaria ca oko.

¹¹Mom abino timo Jerucalem kede jogi mere kite ame rik atimo kede Camaria kede cal jogi mere?”

¹²Kare ame Rwot doŋ otyeko ticcere luŋ i wi kidi me Cion, kede i kom Jerucalem, en bino keto can i kom abaka me Acuria pi wakere mere ame oŋatte kede, kede pi wakere mere me bwono jo.

¹³Pien en okobo ni, “Man otimere pi teko me ciŋa, kede pi ryekona, pien an atye kede ŋec oromo. Atyeko doŋ kobo waŋ lobo a rok apol, acoko doŋ lonyogi ame ayako oko, areto jo ame bedo i wi kom me loc calo twon gweno.

¹⁴Ciŋa onwoŋo ocoko lonyogi yot meicel, kite a dano coko kede toŋ gweno i kor awonnere ocaco oko, acoko i lobogi luŋ kittono; naka ŋattoro gire mom otiŋo ciŋe, ŋattoro daŋ mom odwoko doge, akadi kok.”

¹⁵Lee wakere i kom ŋat ame atoŋŋe kede yen? Onyo ocumeno twero dworre i nyim ŋat atic kede? Lut mom twero tiŋo dano, dano en a tiŋo lut, abiro daŋ mom twero tiŋo dano malo, dano en ame tiŋo abiro malo.

¹⁶Pi mannono, Rwot ame en Rwot me mony bino cwayo too ame jonyo jo ocwe i kom jo mere ocwe, dok bino cwinyo mac i te lonyogi, mac te naŋo oko luŋ.

¹⁷Ceŋ a jo Icrael bino doko mac, Obaŋa a jo Icrael acil wok-ki bino doko calo leb mac; bino waŋo okuto kede ocokocok tyeko i nino acel.

¹⁸Kwogo me buŋere kede lobo mere ame ceko cam atek, Rwot bino jwero kwo mere kede kome oko; bino bedo calo atwo ame ojony.

¹⁹Yen ame bino doŋ i poto mere bino bedo anok meicel ame atin daŋ romo kwano.

²⁰I nino-nono jo Icrael odoŋŋege, kede jo me ot a Yakobo ame obwottege mom dok bino medde jeŋere i kom ŋat obedo pwodogi, ento gin bino jeŋere doŋ i kom Rwot, ame en obedo Obaŋa ame cil me Icrael, iyi ateteni.

²¹Jo odoŋŋege bino dwogo cen baŋ Obaŋa Won Twer, ame gin jo a Yakobo ame odoŋŋege.

²²Pien kadi joni me Icrael bed apol a rom kede kwoyo me dog nam, jo anonokkoro keken i akina jo odoŋŋege en ame bino dwogo cen. Obaŋa doŋ omoko me jwerogi oko pien kite gire atira.

²³Pien Rwot, ame en Rwot me mony, bino jwerogi oko i lobo luŋ, kite ame en doŋ otyeko moko.

²⁴Mannono en omio Rwot, ame en Rwot me mony okobo ni, “Ama wun jona ame bedo i Cion, kur ilwor wunu jo Acuria ka ce gin pwodowu kede lut, kun otiŋo abirogi i komwu kite a rik jo Miciri otimo.

²⁵Pien odoŋ kare anonokkoro keken akemona bino gik oko, inigana te lunyo lokere i komgi, jwerogi oko.

²⁶Rwot me mony bino yeyeŋo lut i komgi, kite a rik ojwero kede jo Midian i ŋet kidi me Oreb; en bino ryeyo abiro mere i wi nam, te daŋ tiŋo malo kite a rik otimo kede i Miciri.

²⁷I nino nono yeccere bino ya oko i kori, lodi mere daŋ obino turo oko i ŋuti.”

²⁸Okwor doŋ oya oko i Rimmon, otuno daŋ doŋ oko i Ayat; kun obedo i Migron, okano yecgi i Mikmac;

²⁹odokoro kulo ote wot buto i Geba; Jo Rama komgi myel, jo Gibea a Caulo oriŋo oko.

³⁰Kuk wunu duru ba, wun jo Gallim! Ter Laical Gam wunu Anatot!

³¹Jo me Madmena tye aŋwec oko, kede jo ame bedo i Gebim pi laro kwogi,

³²Okwor onwoŋo doŋ tye i Nob i nino-nono, gin doŋ tye ayeyeŋo ciŋgi i kom kidi me Cion, ame en kidi me Jerucalem.

³³Nen ba, Rwot ame Rwot me mony, bino miyogi oreue piny bala jaŋ yen adoŋo; jo adoŋo iye luŋ obino ruto oko piny, moro mom bino doŋ ame ocuŋ malo.

³⁴Rwot bino toŋogi luŋ calo yen iyi buŋ, abino jwerogi oko luŋ i paŋa; akadi yen Lebaŋon, gin luŋ daŋ obino reto oko piny.