Read lango Icaya 11 Bible Online

Icaya 11 - lango bible

Icaya 11

¹Atin yat anyen bino tuco kom iciki a Yece, jaŋe bino tuco i lwite.

²Cuny a Rwot bino bedo i kome, cuny me ryeko kede me niaŋ, cuny me poro kop kede me teko cuny me ŋec kede me lworo Rwot,

³cunye bino bedo yom i lworo Rwot. En mom bino ŋolo kop pi gin ame en oneno kede waŋe, akadi ŋolo kop pi kop ame en owinyo i yite,

⁴cite en bino ŋolo kop ocan atira, dok bino ŋolo kop atira baŋ jo a mwol me lobo; en bino jwero lobo i lut me doge, jo areco en bino neko daŋ oko awura me doge.

⁵Alid me tweyo pyere bino bedo kite atira, aco alid me tweyo yie bino bedo kite ame genne.

⁶Epet bino nywako kabedo atin romo, kwac bino nywako kabuto kede atin dyel, roa kede eŋatu bino doŋo karacel, atin atidi en ame bino telogi.

⁷Dyaŋ kede ŋuu ager meicel bino cem karacel, itinogi daŋ bino wuro karacel; obino pito eŋatu paco calo twon.

⁸Atin adot bino tuko i dog ot a codocodo, atin a pwod oryemo aryema i cak, bino rwako ciŋe i ot ororo.

⁹I wi kidina acil me Cion, timoro arac me nek onyo me awano mom bino nen iye, jo me lobo mere luŋ bino bedo jo ame ŋeo Rwot.

¹⁰I nino-nono akwar Yece bino cuŋ calo bendera ame rok apol twero neno, orok luŋ bino penyo tam i baŋe, kan ame en bedo iye bino bedo me kwogo.

¹¹I nino-nono Rwot bino medo ryeyo ciŋe tyen me aryo me kwanyo jo mere ame odoŋ iyi Acuria, i Miciri, i Patroc, i Eciopia, i Elim, i Cinar, i Kamat kede i dog nam.

¹²En bino tiŋo bendera malo pi orok, te coko jo Icrael ame oryemo; bino rayo jo Juda ame onwoŋo okeketa atata, i twok piny aŋwen luŋ,

¹³Nyeko Epraim bino gik oko, jo a wuno Juda obino miyo waŋgi rwenyo oko; Epraim mom bino bedo kede nyeko i kom Juda Juda daŋ mom bino bedo wuno Epraim.

¹⁴Gin bino mwomere i kor kidi a jo Piriciti tuŋ to, eka ote ribere karacel me yako jo i tutuŋ kide, Gin bino lweny i kom jo Edom kede Moab, aco jo Ammon bino bedo ite locgi.

¹⁵Rwot bino miyo pii i jaŋ nam me Miciri dwono oko iweŋ, bino yeŋo ciŋe i wi kulo Eufrate, te miyo poko yi kulo i dul abiro, jo te ŋolo yie kun ginnoro mom dyako amukgi.

¹⁶Yo gudo ame ya Acuria bino bedo tye, pi jo mere ame odoŋ, kite a rik otimere kede pi jo Icrael, i kare ame gin ya i lobo Miciri.