Read lango Icaya 13 Bible Online

Icaya 13 - lango bible

Icaya 13

¹Man en kop ame Obaŋa okobo baŋ Icaya wot Amoj i kom Babulon,

²Tiŋ wunu bendera malo kannaler, lwoŋgi wunu kede dwonwu aloŋo; Yeŋ wunu ciŋwu me gin dony, i dogcel a jo me awora,

³An Rwot ikoma doŋ aciko jona ame olonyere doŋ okome lweny alwoŋo doŋ jona atek i lweny, me miyo akemona cobo ticcere, jona ame awakare kun oŋatte aŋata,

⁴Koŋ iwiny wunu woo ame tye i wi kiddi malo, ame calo lwak jo apipim! Koŋ iwiny wunu kite ame jo me loc kede me rok apapat tye amor kede kun ocokere karacel! Rwot me mony tye akwano monnyere pi lweny.

⁵Gin oya i lobo abor meicel gin obino i agikki me te polo, Rwot karacel kede jami lwennyere, me jwero lobo luŋ oko,

⁶Kok wunu, pien nino a Rwot doŋ ceggi acega; abino acalo to-piny oya i baŋ Won Twer Ducu!

⁷Mannono bino miyo ciŋ jo doko goro, koyo bino onyere i cuny dano acel acel, dok obino bedo ame cunygi oŋabere aŋaba.

⁸Twon rem adwoŋ me lworo kede kumo bino makogi; gin bino minne i rem calo dako amerem me nywal ogoo. Ŋat acel acel bino neno awottere kun kome amyel; waŋgi bino obere calo mac.

⁹Neno wunu ba, nino a Rwot tye abino. En ger, dok akemo kede twon iniga moro ager omako, me miyo lobo doŋ nono kede jwero wegi bal luŋ iye.

¹⁰Pien acer me polo kede dulgi mom bino ryeny; ceŋ bino doko acol ame pwod odonyo adonya, dwe daŋ mom bino ryeny.

¹¹Abino keto can i wi podo pi timere arac, kede i kom jo areco pi balgi; abino giko awaka a jo ame lyerre oko, abino miyo wegi abwone a mom okica kwe oko.

¹²Abino miyo co dokome wel meicel akato jabu ame olio acil oko, jo daŋ bino bedo me wel meicel akato jabu me Opir oko.

¹³Pi mannono, abino miyo polo yeŋere, lobo daŋ bino yeŋere i kabedo mere, pi akemo a Rwot me mony, i nino me iniga mere ager meicel.

¹⁴Dok bino bedo acalo aderi ame aryemo, onyo rommi ame ŋat acoko pe; ŋat acel acel bino dok baŋ jo mere, dok ŋat acel acel bino riŋo i lobo me turgi.

¹⁵Ŋat ame obino nwoŋo, obino cobo pel, ŋat ame obino mako, bino to i pala romo.

¹⁶Itinogi obino cacanyo piny te niŋida atitino kun oneno, obino yako udigi, ote daŋ buto i mongi tetek.

¹⁷Nen ba, an doŋ atugo jo Magi me bino i komgi, rok a mom paro pi ryal jabu daŋ mom olelo gigi iye.

¹⁸Aterogi bino neko awobe; kica mom bino makogi i kom atinnoro; itino gire mom bino conogi,

¹⁹Aco Babulon ame kwogo mere dwoŋ kato me obakki ocele luŋ boma aber ame jo Kaldaya wakere iye wok-ki, bino bedo acalo Codoma kede Gomora i kare ame rik Obaŋa oreto oko.

²⁰Jo mom dok bino bedo iye, dano moro me Arab mom bino guro kema kuno, okwattoro daŋ mom bino miyo rommigi wuro kuno.

²¹Ento leyi me tim bino buto kuno ekwe a kok bino poŋ i udigi; udu bino bedo kunu, kun jogi me tim daŋ myelo kunu.

²²Odyekodyek bino kok i udigi ocuŋ iguŋ malo, ekwe daŋ bino kok i udigi abeco me loc; Babulon mom bino ri, kare mere doŋ ceggi acega.