Read lango Icaya 14 Bible Online

Icaya 14 - lango bible

Icaya 14

¹Rwot bino timo Yakobo kica, bino medo yero Icrael, te dwokogi i lobogi ikome, rok ocele bino notte kedgi, ote moko doŋ i kom ot a Yakobo.

²Rok apol bino lwoko Icrael tero i kabedogi, eka Icrael te lokogi doko opiigi kede aŋecagi i lobo a Rwot; jo ame rik makogi, gin obino mako doko opiigi ote loyo jo ame rik wunogi.

³Kare ame Rwot bino miyogi weo i kom canwu kede i kom myel cunywu kede tic apek ame ibedo tiyo wunu,

⁴ibino cako nywaro wunu abaka me Babulon kede wer man ni, “Koŋ inen kite ame awun jo doŋ okwe kede, kite ame kolo a won apala doŋ okwe kede inoŋ!

⁵Rwot doŋ oturo abiro a jo areco oko, karacel kede abiro oloc,

⁶jo ame obedo pwodo orok kun otye i twon akemo, kun mom juko ciŋgi i komgi; jo ame obedo loyo rok kede iniga, kun mom weko yelogi.

⁷Lobo luŋ doŋ okwe mot, oliŋ doŋ oko, jo iye doŋ mwoco ka wer keken.

⁸Yen cipre cunygi lelo piri aco yen cedar me Lebanon kobo ni, ‘Cakere i kare ame odwoki kede piny, ŋattoro gire mom obino me toŋowa.’

⁹Aco lyel i piny kuca daŋ otugere oko, me rwatte kedi ka ibino, tye acoyo tipo ajo oto me bino joli, jo luŋ a yam obedo otel i wi lobo; obakki luŋ a yam oloo rok apapat omiogi luŋ oya oko i kom me locgi.

¹⁰Jo luŋ bino kobo, kun okobbi ni, ‘Yin daŋ idoko agoro calo wan! yin daŋ idoko calo wan!’

¹¹Kwogo daŋ doŋ okelo oko piny lyel, karacel kede dwon naŋani; dedek doŋ odoko i tanda me butoni, eka kudi te bedo gi-wumereni.

¹²“Kite ame imukere kede i polo ite rette piny, yin Maralle, wot a Ru-piny! Kite ame otoni kede piny, yin ame irereto rok apapat!

¹³Yin ikobo i cunyi ni, ‘An abino yito malo i polo; abino cibo kom me locca malo i wi acer Obaŋa; abino bedo i wi kidi me cokere teŋe tutuŋ anyarodi;

¹⁴abino yito malo meicel, i wi pol malo, abino kette kena me bedo acalo Ŋat Amalo Meicel.’

¹⁵Ento yin doŋ okeli oko piny i lyel, i te bur kan ame tut meicel.

¹⁶Jo ame neni bino ciko waŋgi i komi kun otamo kop i komi ni, ‘Man mom en ŋat ame rik omyelo kom lobo meicel, ame daŋ omio loc apol oyeŋere,

¹⁷ame rik omio lobo odoko acalo tim otal, ame obedo tuturo boma iye oko ame mom rik ye ni obuccere we?’

¹⁸Obakki a rok apapat buta gigi piny i kwogo, kun ŋat acel acel buto i lyel ame oyike iye;

¹⁹aco yin doŋ oboli oko teŋe, ame bor abora i lyelli, calo atin abwogi ame jo okwero, ame owumo kome i jo oneko, jo ame ococobo i pala romo, jo ame donyo piny i gweŋ ame tye i te bur atut piny acalo kom dano oto ame onyono piny.

²⁰Yin mom ibino notte kedgi i ka yik, pien yin doŋ ibalo loboni oko, yin ineko joni oko. “Ikwae otim tim areco myero kono kur dok ocako nyiŋgi!

²¹Yik wunu ka neko itino mere pi roc a kwaroggi me kur oya ote dok leyo lobo, ote miyo boma dok radde atata i wi lobo.”

²²Man kop a Rwot me mony: “Abino ya me lweny i kom jo Babulon, abino miyo nyiŋ jo rwenyo oko i Babulon, jo moro mom bino doŋ iye, akadi itino atino, onyo ikwae.

²³Abino miyo ecoc leo lobogi, dok daŋ atapara bino durre iye adura, abino weyo acil calo dako oweo ode acil kun ginnoro mom oweko iye.”

²⁴Rwot me mony doŋ okwoŋo ni, “Kite ame doŋ atyeko yiko kede con, bino daŋ timere gire kittono, kite ame rik atimo kede bino daŋ doŋ timere kittono.

²⁵Abino gire turo jo Acuria i lobona obedo kidikidi oko, abino nyonogi piny i wi kidina; kol obino gonyo oko i kom jona yec daŋ obino kwanyo oko i wi gwokgi.

²⁶Man en gin ame ayiko ame mako wi lobo luŋ; dok man en ciŋa ame doŋ aryeo oko i wi rok luŋ.”

²⁷Pien Rwot me mony doŋ oyiko yikkere oko, ŋa kara ame dok bino loko? Ciŋe daŋ doŋ oryeye oko, ŋa kara ame dok bino dolo?

²⁸Kop man rik Obaŋa okobo i mwaka ame abaka Akaj oto iye, kun kobo ni,

²⁹“Wun jo me Piriciti luŋ, kur ilel wunu ni pien lut ame rik obedo pwodowu doŋ otur oko, pien ororo bino ya i kom ikwae a twol, aco toŋe bino doko twol a twarre.

³⁰Rwot bino kwayo jo ocan i akina jo mere calo rommi en bino miyogi buto piny i kuc; aco yin abino neko ikwai oko i kec, joni ame odoŋere daŋ abino neko oko,

³¹Kuk ba duru, yin dog boma, kok ba yin boma; wun jo Piriciti luŋ, mi wunu lworo cak onyo koyo i komwu ba! Pien okwor abino i tutuŋ anyarodi, mom tye moro i akinagi ame opokere kene,

³²Kara ibino kobo wunu ŋo ba, baŋ okwena a rokkono?” Ibino kobo wunu ni, “Rwot omio Cion ocuŋ atek, jo mere ame owuno oriŋo olarre iye.”