Read lango Icaya 15 Bible Online

Icaya 15 - lango bible

Icaya 15

¹Man en kop ame Obaŋa okobo i kom Moab: Moab doŋ ogik oko; pien ojwero Ar i dyewor acel keken. Moab doŋ ogik oko; pien Kir daŋ ojwero dyewor acel keken.

²Jo me Dibon doŋ owoto malo i ka woro jogigi me wot koko kuno; jo Moab akoko Nebo kede Medeba. Wi jo luŋ doŋ olyelo gire oko, yer tik daŋ olyelo oko luŋ.

³Jo luŋ tweo pyergi i boŋo cola dye yo, kede i wi udigi kede i dye bomagi jo luŋ kok ame pig waŋgi ony i korgi.

⁴Jo Kecbon karacel kede jo Eleale daŋ akoko, dwongi winyere kom kannabor i Yakaj twal; mannono omio olweny me Moab odoko alwor oko; cunygi doŋ myel amyela.

⁵Cunya ton meicel pi Moab; oriŋ lweny iye doŋ riŋo i Joar naka i Eglat-celicia. Pien gin oyito tur me Lukit kun okobo i pig waŋgi; i yo ame woto tutuŋ Koronaim, gin okok pi kite a lobo otye ka jwero kede oko.

⁶Luŋ i kulo me Nimrim pii doŋ odwono oko iye; lum doŋ oner oko, mom daŋ dok olot; ginnoro ame atu daŋ mom tye.

⁷Mannono omio ginnoro luŋ ame yam gin onwoŋo karacel kede en ame yam okano gin luŋ otero oko loka kulo me Arabim.

⁸Pien koko dwoŋ meicel, tye doŋ omano lobo me Moab luŋ; koko a jo doŋ otuno naka i Eglaim twal, koko otuno daŋ anaka i Beer-elim.

⁹Pien pii me Dibon remo doŋ Opoŋ oko iye; kadi amannono pwod dok abino medo can ocele i kom Dibon, abino kelo daŋ eŋatu i kom jo ame obwot, kede i kom jo ame odoŋ i lobo me Moab.