Read lango Icaya 16 Bible Online

Icaya 16 - lango bible

Icaya 16

¹Gin ocwao itino rommi baŋ oloc me lobo-nono, kun ocwao iya i Cela, obeo kede i yo me tim, otero i wi kidi me Cion.

²Acalo winy ame teteno bwomgi, kede itino winy ame okeketo atata, anyira me Moab daŋ tye kittono kan ame oŋolo iye kulo me Arnon.

³“Mi wunu tamwu iye, ŋol wunu kop kakare; mi tipowu bed acalo dyewor i cuny dyeceŋ; kan a jo ame oryemo opono iye, kur idot wunu ŋat ame oriŋo.

⁴Wek wunu jo ame oryemo me Moab bed i akinawu; wun myero ibed wunu ka-larregi, i ciŋ jo ame otimogi lit. Kare ame jo a wunogi doŋ pe, ame kop me yak doŋ ogik oko, kede ŋat ame nyonogi piny doŋ orwenyo oko i lobo,

⁵obino doŋ cibo kom me loc, kun ocibo i mar a mom lokere, ŋat a genne en ame bino bedo i wie i kema a Daudi ŋat a ŋolo kop dok amito ŋolo kop kakare, ŋat a kome mit i timo gin atye atira.”

⁶Wan owinyo pi awaka a Moab kite ame onwoŋo rik en wakere kede; wakere mere, lyere mere kede apala mere, wakere mere-nono luŋ gire goba keken.

⁷Pi mannono, Moab myero koki, jo luŋ myero kok gire pi Moab. Gin myero kok atek pi anina olok otwo me Kir-karecet, ame doŋ tye i twon cannoro adwoŋ meicel.

⁸Pien potti luŋ me Kecbon doŋ oballe oko, kede olok me Cibna; olok a yam koŋo mere mero rwode me rok apapat doŋ orette luŋ piny. Jaŋe ame yam tuno naka i Jajer, ame yam olak naka i tim twal; ame jaŋe atoco mere yam ojany atek, te kato naka atot i nam.

⁹Mannono omio abino kok pi olok me Cibna, kite ame akok kede pi Jajer. Pig waŋa bino ony i komi yin Kecbon kede yin Eleale; pien woo me lweny owinyere i kom olokwu a yam ipwono wunu.

¹⁰Lelo kede yomcuny doŋ okwanyo oko, i potti ame yam nyako olok meicel; wer daŋ mom dok owero i potti olok, woo moro daŋ dok mom dok winyere iye; nyono olok i bur biyo olok doŋ ogik oko, woo me pwono olok doŋ ogik oko.

¹¹Mannono omio cunya tugere koko pi Moab calo naŋa akok, cunya tugere daŋ pi Kir-kerec.

¹²Dok ka Moab obedo ol nono me bedo wot i kabedo me woro jogi ame tye i wi kiddi malo, kun woto ka kwayo Obaŋa mere i kabedo mere acil, en mom bino twero kadi acel.

¹³Man en kop ame Rwot rik okobo con i kom Moab.

¹⁴Ento aman Rwot okobo ni, “Odoŋ doŋ mwaka adek, acalo mwaka apakaca, kwogo a Moab bino doŋ doko gi-acaa, akadi kono bed en tye kede lwak jo apipim; jo ame bino doŋ bino bedo anok meicel kun daŋ gin jo agoro keken.”