Read lango Icaya 17 Bible Online

Icaya 17 - lango bible

Icaya 17

¹Man en kop ame Obaŋa kokobo i kom Damaciko. Nen ba, Damaciko mom dok bino medde bedo boma, bino doŋ doko wi obur.

²Boma mere doŋ bino doko tim atwal, bino doko me bedo a lim akwo, ame bino wuro kuno aboŋo ŋattoro ame miogi lworo.

³Cel atek bino rwenyo gire oko Epraim, loc daŋ bino rwenyo oko i Damaciko; aco jo odoŋ me Curia bino bedo acalo kwogo ikwae Icrael. Man kop a Rwot me mony ikokome.

⁴I nino-nono obino jwiko kwogo a Yakobo oko, moo i kome daŋ bino loo oko.

⁵Bino bedo kite ame akaa kac depo kede kal ame pwod tye i poto, kun kao wit kal coko i ciŋe dok kite ame depo kede wit kal ame odoŋ i luŋ me Repaim.

⁶Dok bino bedo kite ame dano depo kede nyig Jeituni, ame ginnoro anonok kom en ame doŋ iye, kun odoŋ ka aryo onyo adekkoro keken i midi mere malo, anwen onyo abiccoro keken en ate doŋ i ajaŋ yat ame nyak, man kop a Rwot Obaŋa me Icrael ikokome.

⁷I nino-nono jo bino ciko wangi i kom Acwecgi, wangi bino cun i kom ŋat Acil ame obedo Obaŋa a jo Icrael;

⁸mom dok obino ciko waŋgi i kom keno me woro jok a dako ame olwoŋo ni Acera ame gin otio kede ciŋgi, mom obino neno gin ame gin i komgi otio, kadi yen ame opito ka oworo jok Acera onyo keno me waŋo odok akur.

⁹I nino-nono bomagi atek bino bedo calo wi obur a jo Kivi kede me a jo Amor, ame yam gin obin oya iye oko pi jo Icrael; kuno doŋ bino doŋ nono.

¹⁰Pien wiwu doŋ owil oko i kom Obaŋa ame olarowu, dok daŋ mom ipo wunu i kom Kidi ame en kan ame iriŋo ilaro wunu; mannono omio kadi bed ipit gigi mogo a yomoro cuny, dok ipit wunu daŋ yennogo ame obedo me obaŋe mogo a wele,

¹¹kadi bed imigi wunu tu i nino ame opitogi iye, dok ite miyogi wunu turo oko odiko ame opitogi iye, cite mom ibino kayo wunu ginnoro i nino me can kede rem a mom gik.

¹²Koŋ inen ba, kite ame rok apol woo kede acalo kot amor omwoc i woo kite ame nam mor kede.

¹³Rok mor kite ame twon pii adwoŋ meicel mor kede cite en bino jukogi, gin te riŋo kannabor, obino ryemogi calo cuŋ kal ame yamo kolo i wi kidi malo, dok acalo apua ame awirre i nyim kot a bukoro.

¹⁴Nen ba, twon lworo adwoŋ bino mako jo otyeno, ame piny mom ru oru, nwoŋo gin doŋ pe! Man en dul a jo ame yakowa, kede gin ame opokki jo ame maojamiwa.