Read lango Icaya 18 Bible Online

Icaya 18 - lango bible

Icaya 18

¹Yin lobo ame tye loka kulo Eciopia, yin lobo ame kudi iyi ŋur calo yamo ajuru; ame ioro okwena me cumji i lobo ocele beo i kulo Nail, kun owoto i yee ame otio kede aladu ame kwan i wi pii!

²Dok wunu cen, wun okwena ame dwir, baŋ rok odoŋo aboco dok ame komgi pwot, baŋ rok olworo i kabedo luŋ, rok atek, ame gin oloc i lweny, ame kulli opoko lobogi i dyere.

³Wun jo luŋ ame ibedo wunu i wi podo, wun jo ame bedo i lobo, ka ce otiŋo bendera malo i wi kidi, myero inen wunu! Ka ce okuto apel, myero iwiny wunu!

⁴Pien Rwot okobba ni, “Abino neno gira liliŋ i kabedona, bala lyeto me ceŋ ame ryeny dyeceŋ, bala pol ame kelo toyo i kare me kac.”

⁵Pien ame kare me pwono olok mom ru oromo, kun turre doŋ ocako ony oko, kun turre doŋ odoko nyig olok ame ocako doŋ cek oko.

⁶Kom jo oneko luŋ obino weko oko ata, baŋ acut ame tye i wi kidi malo, kede baŋ leyi me tim. Acut bino camogi oko i dye oro, leyi me tim bino camogi oko i kare me koyo. Acut bino camogi oko i dye oro, leyi me tim bino camo komgi oko i kare me koyo.

⁷I kare-nono rok ame odoŋo aboco dok ame komgi pwot, bino kelo mot baŋ Rwot me mony. Gin rok ame olworo i kabedo luŋ, rok atek, ame gin oloc i lweny, rok ame kulli opoko lobogi i dyere. Gin bino kelo motginono i wi kidi me Cion, kan ame oworo iye Rwot me mony.