Read lango Icaya 20 Bible Online

Icaya 20 - lango bible

Icaya 20

¹I mwaka ame atel wi mony adwoŋŋere ame Cargon abaka me Acuria ocwao obino i Acidod, te lweny i kome, mayo oko,

²i kare-nono Rwot onwoŋo rik omio Icaya wot Amoj okobo koppere kun kobo ni, “Wot igony boŋo kwero cola oko i pyeri ite gonyo daŋ amuk oko i tyeni.” En daŋ te wot timo kittono, te daŋ wot onoro kun tyene daŋ nono.

³Rwot te kobo ni, “Kite acalo Icaya amirona owoto onoro, kun tyene daŋ nono, pi mwakki adek twal, me nyuto gin ame bino timere i kom jo Miciri kede Eciopia,

⁴abaka me Acuria bino daŋ timo kittono, en bino tero jo me Miciri oko iyi opii, kede jo me Eciopia daŋ, bino tero itino kede jo adoŋo, kun gin owoto onoro, ame tyengi daŋ nono, kwon nunygi daŋ tye nono, ame mannono bino kelo lewic i Miciri.

⁵Mannono bino poyo komgi, lewic te makogi pi Eciopia ame yam gin ogeno, kede Miciri ame yam gin owakere pire.

⁶I nino-nono jo ame bedo i dog nam bino kobo ni, ‘Koŋ inen wunu doŋ gin ame otimere i kom jo ame yam ogeno, ame yam wan oriŋo olaro baŋgi me konyowa, larowa i ciŋ abaka me Acuria. Kara wan doŋ obino bwot iŋo ba?’ ”