Read lango Icaya 21 Bible Online

Icaya 21 - lango bible

Icaya 21

¹Man kop ame Obaŋa okobo i kom Babulon, ame en lobo a tye i dog nam. Kite ame yam ajuru mwomere kede i Negeb, tye cannoro ame bino kittono i tuŋ tim, kun oya i lobo ame iyiliyili meicel.

²Obaŋa onyuta anyuttoro apek meicel, abwol jo gire bwolo jo abwola, abal lobo jwero jo i lobo oko. “Yin Elim wot ilweny malo, yin Media, gur ba doŋ boma oko! Abino giko kit cannoro luŋ ame Babulon okelo, abino miyo gik gire oko.”

³Paro gire omio rem ociro gira pyera oko; omio rem kom ocoba oko, acalo dako amerem nywal ogoo; odia doŋ piny ame mom aromo winyo ginnoro; apoyo koma doŋ apoa, ame mom doŋ aromo neno ginnoro.

⁴Tam oloa gira doŋ oko, twon lworo moro adwoŋ meicel obalo gira wia oko; ame abedo paro pi piny acol me ka ŋa abeo-nu, ame dok olunyo kela ka myelkom.

⁵Gin doŋ oyiko gire meja oko, opeto okeka daŋ doŋ oko, otye doŋ ocem kun daŋ omatte. Ya wunu malo ba, wun oloc, we wunu ba kom kwot kede moo.

⁶Pien Rwot okobba ni, “Wot ikel wunu akurpiny, myero en titi gin ame eneno.

⁷Ka en bino neno wegi aguragura ame riŋo aryo aryo, jo ame tye i wi kana kede jo ame tye i wi inaga myero en cik yite atek, dok enengi aber meicel.”

⁸Ŋat oneno te redo ni, “Ama Rwot, an acuŋ i wi pem malo dyeceŋ ducu, acuŋ gira i kakara dyewor benebene,

⁹Nen wegi aguragura tye ariŋo aryo aryo.” Ote gamo doge ni, “Babulon orette oko, orette gire oko; cal jogi mere luŋ ame opao, oŋininyo gire oko piny.”

¹⁰Aco wun jona, ame odinowu ote pyetowu calo kal, gin ame awinyo i baŋ Rwot me mony, ame en Obaŋa me Icrael, en ame atittiwu.

¹¹Man en kop ame Obaŋa okobo ame otiko Duma: Ŋattoro tye alwoŋa i Ceir, kun penya ni, “Akurpiny, dyewor obedo iŋo? Akurpiny, dyewor obedo iŋo?”

¹²Akurpiny te gamo ni, “Piny doŋ oru oko, dyewor dok bino dwogo. Ka ce imito penya pire, itwero dok dwogo penya; itwero gire dwogo tyen me aryo.”

¹³Man en kop ame Obaŋa okobo ame otiko lobo a jo Arab: Wun jo Dedan ame iciro iwoto wunu-ni, ibino buto wunu i dye okuto otwo atwoa ame tye i lobo a jo Arab.

¹⁴Kel wunu pii baŋ jo ame oryo pii ociro, kel wunu cam baŋ oriŋ-ayela, wun jo me bedo i lobo me Tema.

¹⁵Pien gin oriŋo pala me romo, pala ame doŋ owoto oko iyi akure, kede akud atero ame doŋ otelo oko, kede peko ame lweny kelo.

¹⁶Pien man en kop ame Rwot okobba, ni, “Odoŋ doŋ mwaka acel keken, acalo mwaka me pakaca, kwogo me Kedar luŋ bino doko gi-acaa;

¹⁷dok jo atek me Kedar ame bino doŋ i akina jo ame celo atero, welgi bino bedo anok; pien Rwot ame en Obaŋa a jo Icrael doŋ okobo.”